Дарё” нашри 16 февралда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
Россиянинг Украинага аралаш ҳужумидан мақсадлари
16 февралга ўтар кечаси Россия Украинага ракета ва учувчисиз учоқлар ёрдамида “аралаш ҳужум” уюштирди. Бу ҳақда Украинанинг “Жануб” Қуролли кучлари оператив қўмондонлиги матбуот котиби Наталя Гуменюк маълум қилди.
Хусусан, Гуменякнинг сўзларига кўра, рус қўшинлари саккизта “Калибр” ракетасини учирган. Барча ракеталар — олтитаси Николайев вилояти, иккитаси Херсон вилояти устида уриб туширилган.
“Афсуски, шу билан бир қаторда душман мағлубиятнинг бошқа усулларини ҳам қўллади – бу аралаш ҳужум эди, хусусан, дрон ва стратегик самолётлар ёрдамида амалга оширилди. Лвов вилоятида зарбалар айрим нишонларга тегган”, — деди у.
Украина президент офисининг раҳбари Андрей Ермак Россия қўшинлари “тактикасини бироз ўзгартирганини” айтди. “Улар сохта нишонлардан фойдаланган ҳолда фаол разведка ишларини олиб бормоқда”, — деб ёзган Ермак Telegram’да.
Ермакнинг сўзларига кўра, ҳужумдан бошқа ҳудудлар ҳам жабр кўрган. Хусусан “Украинанинг шимоли, ғарбий қисми, шунингдек, Днепрбўйи ва Кировоград вилоятларига зарбалар берилган.
Украинадаги босқинда тўғридан тўғри иштирок этмаётган Беларусь. Лукашенко Путин билан учрашади
Минск агар Беларусга қарши тажовуз содир этилсагина ҳарбий ҳаракатларда қатнашишга тайёр. Бу ҳақда 16 февраль куни республика президенти Александр Лукашенко журналистлар билан учрашувда айтиб ўтди.
“Мен ҳозирча фақат бир ҳолатда россияликлар билан бирга Беларусь ҳудудидан туриб жанг қилишга тайёрман: агар у ердан (Украинадан) бир нафар бўлса ҳам аскар менинг халқимни ўлдириш учун Беларусь ҳудудига қадам босса. Агар улар Беларусга қарши тажовуз қилса, жавоб энг оғир бўлади, уруш эса бутунлай бошқача тус олади”, — деди Лукашенко.
Унинг аниқлик киритишича, бу шарт нафақат Украинага, балки “бошқа қўшниларга” ҳам тегишли.
Беларусь Россиянинг Украинадаги босқинига тўғридан тўғри иштирок этмаяпти, Беларусь армияси Украина ҳудудига кирмаган. Урушни тадқиқ қилиш институти (ISW) таҳлилчилари хулосасига кўра, Александр Лукашенко, катта эҳтимол билан, Россия президенти Владимир Путиннинг Украинадаги урушда қатнашиш таклифини рад этган.
Шунингдек, журналистлар билан учрашувда Лукашенко эртага, 17 февраль куни Путин билан учрашишини маълум қилди.
Жанубий Корея ўзининг расмий ҳужжатида Шимолий Кореяни душман деб атади, Япония билан қадриятлар бирлаштириладими?
Жанубий Корея Мудофаа вазирлиги 2022 йилги мудофаа бўйича Оқ китобида Шимолий Корея режими ва ҳарбий кучларини сўнгги олти йил ичида биринчи марта “душман” деб атади. Бу ҳақда Yonhap агентлиги хабар беради.
“Чунки Шимол ҳукмрон партия Марказий қўмитасининг 2022 йил декабрида бўлиб ўтган ялпи мажлисида бизни шубҳасиз душман деб белгилаган ва ўз ядровий дастуридан воз кечмаган ҳолда ҳарбий таҳдид туғдиришда давом этмоқда, Шимолий Корея режими ва ҳарбийлари — бу таҳдид ижрочилари — бизнинг душманларимиздир”, — дея ҳужжатдан иқтибос келтирган агентлик.
Шимолий Корея армияси биринчи марта 1995 йилда Жанубий Корея мудофаа сиёсати ҳужжатида “душман” деб белгиланганди. 2004 йилги версияда “душман” ибораси, муроса фонида “тўғридан тўғри ҳарбий таҳдид” билан алмаштирилди.
Кейинчалик 2018 ва 2020 йилларда Шимол билан ярашишга интилган президент Мун Чже Ин даврида бу ном расмий қайдлардан олиб ташланган эди. Оқ китоб Жанубий Корея Миллий Мудофаа вазирлигининг расмий ҳужжатидир. У ҳар икки йилда бир марта нашр этилади ва мамлакатнинг ҳарбий сиёсати ҳақидаги маълумотларни ўз ичига олади.
Оқ китобда Япония 2018 йилдан бери биринчи марта “яқин қўшни” номини олди. “Корея Республикаси ва Япония қадриятларни бирлаштирмоқда.
Довондаги қор кўчкиси бўйича расмий маълумот берилди
Қамчиқ довонида қор кўчкиси содир бўлгани ҳақида хабарлар тарқалди. Фавқулодда вазиятлар вазирлиги ахборот хизмати ҳолат юзасидан маълумот берди.
Хабарга кўра, воқеа Тошкент–Ўш халқаро автомобиль йўлининг Қамчиқ довонига тўғри келадиган қисмида содир бўлган.
15 февраль куни соат 22:40 да йўналишнинг юқорида айтилган қисмида ҳажми 1300 метр куб бўлган қор кўчкиси содир бўлди. Қор массасининг бир қисми йўлга тушган.
Қайд этилишича, ушбу ҳодиса натижасида ҳеч ким жабрланмаган. Воқеа жойига зудлик билан етиб келган Фавқулодда вазиятлар вазирлиги ходимлари йўлни қор массасидан тозалашган.
Фавқулодда вазиятлар вазирлиги ахборот хизмати довон ёпилгани сабабли Оҳангарон—Ангрен—Андижон қўшимча темирйўл рейси амалга оширилганини маълум қилди.
Изоҳ (0)