Тошкентда ноқонуний тарзда дори савдоси билан шуғулланиб келган шахслар ушланди
Тошкент шаҳрининг Яккасарой туманида дори воситалари савдоси билан шуғулланиб келган шахслар қўлга олинди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.
Фото: Бош прокуратура ҳузуридаги Иқтисодий жиноятларга қарши курашиш департаменти
Маълум қилинишича, фуқаро М.У. ўтказиш мақсадида бошқа шахслардан олиб келган сифатини тасдиқловчи ҳужжатлари бўлмаган 300 қути (жами 1 500 дона) “Феррозал” номли дори воситасини фуқаро Т.А.га 21 млн сўмга сотган вақтида ушланган.
Сўнг унинг автомашинасидан яна 4 қути дори воситалари ашёвий далил сифатида олинган.
Мазкур ҳолат юзасидан Жиноят кодексининг 186-3-моддаси (сифатсиз ёки қалбакилаштирилган дори воситаларини ёхуд тиббий буюмларни ўтказиш мақсадида ишлаб чиқариш, тайёрлаш, олиш, сақлаш, ташиш ёки ўтказиш, дори воситаларини ёки тиббий буюмларни дорихоналардан ва уларнинг филиалларидан ташқарида реализация қилиш) билан жиноят иши қўзғатилиб, тергов ҳаракатлари ўтказилмоқда.
Дори воситаларининг ноқонуний савдоси
Ўзбекистонда 2024 йилнинг 10 ойида 2,5 мингдан зиёд қалбакилаштирилган дорилар аниқланган эди. Тақдим қилинган дори воситалари ва тиббий буюмлар ўрнатилган тартибда лаборатория текширувидан ўтказилганда, таҳлил натижаларига кўра, ноқонуний муомалада бўлган:
5 958 ўрам — давлат рўйхатидан ўтган ва мувофиқлик сертификати мавжуд;
17 925 ўрам — давлат рўйхатидан ўтмаган ва мувофиқлик сертификати мавжуд бўлмаган;
557 ўрам — ёрлиқлаш кўрсаткичи бўйича номувофиқ (контрафакт);
Ушбу сифатсиз, қалбакилаштирилган ва Ўзбекистонга ноқонуний кириб келган фармацевтика маҳсулотлари айланмасининг олди олинди.
Август ойида Андижонда ноқонуний дори воситалари савдоси билан шуғулланганларга ҳукм ўқилганди. Дори воситаларининг умумий қиймати 1 млрд 616 млн 802 минг сўмни ташкил қилган. Жиноят ишлари бўйича Қўрғонтепа туман суди томонидан фуқарога нисбатан 5 йил ҳамда шеригига нисбатан 3 йил муддатга озодликдан маҳрум қилиш жазоси тайинланган.
Сентябрь ойида Тошкент вилоятининг Оҳангарон туманида ноқонуний дори воситалари савдоси билан шуғулланиб келган шахслар ушланган. Октябрь ойида Тошкент шаҳрида 2,2 млрд сўмлик яроқлилик муддати ўтган дори воситаларини муомалага киритилишининг олди олинганди.
Шунингдек, Хоразмда қарийб 240 млн сўмлик дорилар ноқонуний сотилишининг олди олинди. Бундан ташқари, Тошкент шаҳрининг Чилонзор туманида 4 000 қути қалбаки дори воситаларини сотаётган шахслар ушланди.
Изоҳ (0)