Ҳаётдаги айрим вазиятларда инсон ўзини ёлғиз ҳис этади. Турмушдаги қандайдир муаммолар, мавсумий тушкун кайфият ёки яқин инсонлар билан келишмовчиликлар бунга сабаб бўлиши мумкин. Мана шундай дақиқаларда ички энергиянгизни қайта тўлдиришга қодир бўлган илҳомбахш фильм ва сериаллар сизга ёрдамга келади.
“Унинг уч қизи” (2023)
Сюжет марказида Кети, Рейчел ва Кристина исмли опа-сингиллар туради, улар саратон касаллигидан вафот этаётган отасини қўллаб-қувватлаш учун ота уйларига қайтишга мажбур бўлади. Алоҳида ўтказган узоқ йиллар давомида қизлар бир-бирлари билан алоқани узган бўлади. Уй-жой ва мерос масаласи кўтарилганда оиладаги вазият янада оғирлашади.
Ушбу оилавий драмада ўз вақтида айтилмаган сўзлар, ечилмай қолган муаммолар энг яқин инсонларингизни йўқотишингизга сабаб бўлиши мумкинлиги кўрсатади.
“Ҳаётда яшамоқ” (2023-2024)
Маркетолог Анна Богинскаянинг турмуш ўртоғи автоҳалокатда вафот этгач, тушкунликка тушади. Маълум вақтдан сўнг жарроҳ Матвей билан учрашув унга янги севгига умид бахш этади, лекин тез орада у йигитнинг хатти-ҳаракатларида номақбулликларни сеза бошлайди. Анна йигитни текширгач, маълум даражада мазҳабни эслатувчи пикапер йигитлар клубининг қурбони бўлганини билиб қолади.
Сериал бош қаҳрамони каби ҳаёт ўз йўлини йўқотиб қўйганлар учун мос келади. Иккинчи фаслда Анна бутунлай янги қиёфадаги аёлга — ўз ҳуқуқларини ҳимоя қила оладиган ва озор берувчи гапларга қатъий жавоб қайтаришга қодир инсонга айланади.
“Менинг пингвин дўстим” (2024)
Фильмдаги асосий қаҳрамон ҳаётида катта фожиани бошдан кечираётган пайтда тасодифан адашиб қолган пингвинни топиб олади. Балиқчи янги дўстни парвариш қилиш вақтида унга боғланиб қолади. Жажжи пингвин ундаги бир вақтлар унутилган туйғуларни қайта уйғотади ва қаҳрамон ҳаётнинг қувончларини қайта кашф қила бошлайди.
“Аманда” (2022)
24 ёшли Аманда қандай қилиб дўст тутинишни билмагани учун кунларини ёлғизликда ўтказади. Ҳар шанба куни у уйи яқинидаги кафега — дискотекага боради, лекин ҳеч ким билан гаплашишга журъат этмайди. Унинг онаси Амандани қўшни қиз Ребекка билан дўстлашишга ундайди, натижада Аманда оз бўлса-да ижтимоийлашишга ҳаракат қилади. Мазкур италян драмаси қарама-қаршиликларнинг бир-бирини доим ўзига тортиши ҳақидаги эски мавзуни кўтаради. Катталар дунёсида ўзини топа олмаган икки қиз ўртасидаги мулоқот уларга инсонлардан узоқда бўлиш одатидан қутулишга ёрдам беради.
“Яшаш учун 257 сабаб” (2020)
Женя Короткова ҳаётидаги энг катта ғалабани қўлга киритади — у саратон касаллигини енгади. Аммо уч йиллик курашиш давомида Женя кўп нарсаларни йўқотади: эндиликда соғайган қиз ҳеч кимда ҳамдардлик уйғотмайди, унинг қаллиғи раҳми келгани учунгина Женяни ташлаб кетмаган бўлади, синглиси эса даволаниш учун йиғилган пулни ўзлаштириб олади. Ҳатто унинг дугоналари ҳам аввал касал бўлган қиздан жиркана бошлайди. Шундай кунларнинг бирида Женя ўзининг эски кундалигини топиб олади, унда яшаш учун 256 та сабаб рўйхати тузилган бўлади. Қаҳрамон унга 257-рақамли сабабни — “ҳақиқий севгини топиш”ни қўшади ва ҳаётини қайтадан қуради.
“Субстанция” (2024)
Деми Мур ижросидаги Элизабет Спаркл аэробика машғулотлари ҳақидаги телекўрсатув олиб борувчиси бўлади. У 50 ёшга тўлганда, продюсер унинг ўрнига қандайдир ёш юлдузни кўришни истаб, Элизабетни ишдан бўшатади. Айнан шу пайтда Элизабетнинг қўлига “Субстанция” номли препарат тушиб қолади. Бу дори унинг ёшроқ, гўзалроқ ва мукаммалроқ янги версиясини яратишни ваъда қилади. Аммо ҳафтадан бир марта у ўз ҳолатига — қари аёл танасига қайтиши керак бўлади. Аммо келиб чиқиши номаълум бўлган воситани истеъмол қилиш турли кўнгилсиз воқеаларга сабаб бўлади.
“Идеал кунлар” (2023)
Мазкур Япония драмаси 2023 йилда йилнинг энг яхши хорижий фильм учун “Оскар” номинациясини олган. Унда фаррош бўлиб ишлайдиган Хирояма исмли ўрта ёшли эркак ҳақида ҳикоя қилинади. Унинг кундалик ҳаёти “Суғур куни”га ўхшайди — мунтазам равишда такрорланади.
Унинг боғдорчилик, аудиокассета тинглаш ва китоб ўқиш каби севимли машғулотлари бор, лекин бир неча учрашувдан кейин ҳаммаси ўзгаради. Энди у одатдаги комфорт зонасидан ҳақиқатан ҳам қониқадими ёки йўқми, ўйлай бошлайди.
“Кўчманчилар ўлкаси” (2021)
Френсис Макдорманд ролини ўйнаган бош қаҳрамон эрининг ўлимидек катта жудоликни бошидан кечиради. 60 ёшида ишидан айрилгач, у қадрдон шаҳрини тарк этиб, фургонда яшаб, кўчманчи ҳаёт кечириб, Америка бўйлаб саёҳат қилишга қарор қилади.
Фильм Американинг одатий қиёфасини эмас, балки бир штатдан иккинчи штатга кўчиб юриб, меҳнат қилувчи оддий аҳолининг ҳаётини ёритади. Фильмда америкалик одамлар умрини чексиз ҳаракатда ўтказадиган оддий меҳнаткашлар нигоҳи билан кўрсатилади.
“Ҳаммаси ҳар жойда ва бирданига” (2022)
Эвелин Вонг Америка кир ювиш марказини очади, аммо унинг бизнеси яхши даромад келтирмайди. Бир вақтнинг ўзида аёлнинг солиқ тўловлари билан муаммо юзага келади, фарзандининг тарбиясида кескин ўзгаришлар содир бўлади ҳамда отаси билан муносабатларида қийинчиликларга дуч келади. Бунинг устига, Эвелин турмуш ўртоғидан ажрашади. Бир вақтда бошига турли хил офатлар келган Эвелин тўсатдан ўзида ноодатий кучни кашф этади ва ҳаётини ижобий томонга ўзгартиришга бел боғлайди.
“CODA: Эшитмайдиган ота-онанинг фарзанди” (2020)
Қулоғи эшитмайдиганлар оиласи Американинг чекка қишлоғида яшайди. Улар балиқ ови билан кун кечиради. Оиладаги кенжа қиз Руби улар орасидаги ягона эшитувчи одам бўлиб, оиласи ва ташқи дунё ўртасида боғловчи инсон вазифасини бажаради. Қиз хор гуруҳига қўшилиб, қўшиқ куйлашни ёқтириб қолганида унинг ҳаёти кескин ўзгаради. Натижада қиз олдида икки мураккаб танлов туради: оилага доимгидек ёрдам бериш ёки мусиқа карьерасини танлаш.
2022 йилги “Оскар” тақдирлаш маросимининг энг яхши фильми деб топилган. Бундан ташқаи, картина Gotham Awards, BAFTA, Spirit’s Choice ва бошқа бир қатор мукофотларни қўлга киритган.
“Уч минг йиллик тилак” (2022)
Алетея исмли тилшунос мутахассис ўзининг янги маърузалар курси билан Истанбулга учиб келади. Эсдалик совғалари сотиладиган дўконлардан бирида у ичида жин яшайдиган қадимий шиша бутилкани харид қилади. Жин озодликка эришиш учун Алетеянинг учта истакларини бажаришга тайёр туради, аммо доно қиз тилакларни беҳуда сарфламасликка ва бунинг ўрнига жин қандай қилиб бундай ҳолатга келиб қолганини билишга ҳаракат қилади. Шундай тариқа жин ҳаёти ҳақидаги ҳикояни бошлайди.
“Рассом ва ўғри” (2020)
Чехиялик рассом Барбора Кисилкова Ослодаги кўргазмада ўзининг иккита ажойиб асар — “Оққушлар қўшиғи” ҳамда “Хлоя ва Эмма” асарларини намойиш қилади. Тез орада иккала расм ўғирланади, аммо жиноятчилар қисқа вақтда қўлга олинади. Барбора жиноятчилардан бири билан учрашади ва унинг суратини чизишга қарор қилади. Суҳбат давомида рассом ҳам, ўғри ҳам кутилмаган қирралари очилади ва улар ўртасида ҳиссий алоқа ҳосил бўлади.
Изоҳ (0)