Жорий йилда 22 миллиард сўмдан ортиқ дори воситаси ва тиббиёт буюмлари бепул берилди. Бу ҳақда АОКАда бўлиб ўтган брифингда “Дори-дармон” АК бошқарма бошлиғи Хуршида Эшбекова маълум қилган.
Маълум қилинишича, Соғлиқни сақлаш вазирлиги томонидан тасдиқланган рўйхатга асосан ҳозирги кунда “Ижтимоий аҳамиятга эга касалликларни даволашда қўлланиладиган дори воситалари ва тиббий буюмлар рўйхати”га жами 133 та шундан 126 та дори воситаси ва 7 та тиббий буюмлар киритилган. Вазирлар Маҳкамасининг 2013 йилдаги 204-сонли қарори билан амбулаторияда даволанишда дори воситалари билан имтиёзли таъминланиш ҳуқуқига эга бўлган 14 тоифадаги шахслар рўйхати белгиланган.
“2024 йилнинг 9 ойи давомида мазкур рўйхатдаги шахсларга компаниямиз ва унинг тизимидаги жамиятларга қарашли дорихоналар орқали 292 750 та рецепт орқали 22 млрд 136 млн сўмлик дори воситаси ва тиббиёт буюмлари бепул берилди.
Умуман олганда, компаниямиз томонидан 2024 йилнинг 9 ойи давомида 22 млрд 671 млн сўмлик ижтимоий аҳамиятга эга дори воситалари харид қилинди”, дейди Хуршида Эшбекова.
Таъкидланишича, жорий йилнинг шу даврига қадар 1 млн 100 минг дозадан ошиқ гриппга қарши вакциналар олиб келинган бўлиб, ушбу вакциналар санитария-эпидемиология осойишталик ва жамоат саломатлиги хизматига, тиббиёт марказларига, қуроллик кучлар, Ички ишлар вазирлиги, хусусий ташкилотларга, вакцинация марказларига етказиб берилган.
Ўзбекистонда 2023 йилда 14 тоифадаги шахсларга рецепт орқали 68 120 та 25 миллиард сўмлик дори воситаси ва тиббиёт буюмлари бепул берилганди.
Изоҳ (0)