Миср Ўзбекистонга гепатит C га қарши дорилар етказиб беришни тиклади. Бу ҳақда “Дунё” ахборот агентлиги хабар берди.
Қайд этилишича, 14 декабрь куни Uzbekistan Airways самолёти орқали 7200 дона “Софосбувир” дори воситасидан иборат беғараз ёрдамнинг саккизинчи партияси Тошкентга етказилган. Бу дорилар Соғлиқни сақлаш вазирлиги ҳузуридаги Вирусология илмий-текшириш институтидаги беморларга тақсимланади.
Ўзбекистон элчихонаси берган маълумотга кўра, Миср ҳукумати умумий ҳисобда 800 минг дона (тахминан 40 тонна) “Даклатасвир” ва “Софосбувир”, “Энтекавир” дори воситаларини тақдим этади. Уларнинг қиймати 4,2 миллион долларни ташкил этади.
Ҳозиргача мамлакатга умумий қиймати 1461 минг долларлик 13,4 тонна дори воситалари босқичма-босқич юборилган.
Мутахассислар ҳисоб-китобига кўра, бир нафар беморнинг 3 ойлик тўлиқ даволаш курси учун 3 қадоқ “Даклатасвир” ва 3 қадоқ “Софосбувир” керак бўлади. Мазкур даволаш курсининг Мисрдаги ўртача нархи 31 доллар бўлса, Ўзбекистонда жорий йилга қадар 100 долларга баҳоланиб келинган.
Изоҳ (0)