Германия парламентининг бюджет қўмитаси қурол-яроғ сотиб олиш бўйича 20 миллиард евролик пакетни тасдиқлади. У илғор қуроллар, ўқ-дори, шунингдек, 4 та сувости кемасини ўз ичига олади. Бу Дональд Трамп Оқ уйга қайтаётган вақтда юз берди. АҚШнинг сайланган президенти НАТО аъзолари, хусусан, Германияни мудофаа харажатларини оширишга ундаб келади.
Совуқ уруш тугагач, Германия қуролланиш масаласига эътиборни камайтирди. Бироқ Россиянинг Украинага кенг кўламли босқинидан сўнг вазият ўзгарди. Воқеадан бир неча кун ўтиб, канцлер Олаф Шольц мамлакат қуролли кучларининг жанговар салоҳиятини ошириш учун 100 миллиард евро (103,8 миллиард доллар) қўшимча маблағ ажратилишини эълон қилди.
Бундестаг қўлловидан ўтган пакет 38 та йирик лойиҳани ўз ичига олади. Қўмита, шунингдек, ракетага қарши мудофаа, реактив артиллерия ва киберхавфсизлик тизимларини молиялаштириш бўйича режаларни маъқуллади. Германия мудофаа вазири Борис Писториус қонунчиларнинг мазкур қарорини олқишлаб, бу "ҳозиргача энг юқори кўрсаткич" эканини айтди.
Германия мудофаа вазирлиги харажатлар ортишини “Россиянинг Украинага нисбатан агрессияси ва Европага қарши гибрид ҳужумлар ортиб бораётгани” билан изоҳлаган.
Аввалроқ Россия мудофаа вазири НАТО билан тўқнашувга тайёргарлик кўрилишини маълум қилганди. Андрей Белоусовга кўра, Шимолий Атлантика альянси томонидан 2024 йил июль ойидаги саммитида қабул қилинган қарорлар "вазиятнинг ҳар қандай ривожланишига тайёргарлик кўриш"ни тақозо қилади.
Германия НАТОнинг муҳим аъзоларидан бири ҳисобланади. Мамлакатда Қўшма Штатларнинг 30 мингдан ортиқ ҳарбийси бор. Қолаверса, Берлин юқори технологик қуролли кучларга эга.
Изоҳ (0)