Марҳум журналист Рамина Ягафарованинг синглиси Диана Иртуганова президент Шавкат Мирзиёев ва унинг ёрдамчиси Саида Мирзиёевага мурожаат қилди.
Иртуганова президент ва президент ёрдамчисидан опасининг ўлими бўйича терговга аралашишларини сўраган.
Унинг айтишича, жиноят иши қўзғатилганига қарамай, тергов чўзилиб кетмоқда ва ўтказилган экспертизалар “Доктор Сервис” клиникаси шифокорларининг айби борлигини тасдиқлади. У клиника эгаси собиқ футболчи Сервер Жепаров эканини ва у ўз алоқаларидан фойдаланиб терговга таъсир ўтказиши мумкинлигини таъкидлади.
Иртуганова қонунлар нима учун оддий фуқароларни ҳимоя қилмаётганидан ҳайратда эканини билдирди ва айбдорларни жавобгарликка тортишда ёрдам сўради.
2023 йилнинг 13 сентябрь куни “Дунё бўйлаб” телеканалининг 31 ёшли бошловчиси Рамина Ягафарова вафот этгани ҳақида хабар берилган эди. Кейинроқ марҳуманинг синглиси ҳодиса ҳақида айтиб берганди.
Унинг билдиришича, Рамина Ягафарова 12 сентябрь куни тунда Чилонзор туманидаги хусусий клиникалардан бирида даволанаётган онасини кўриш учун борган.
Кечки пайт у ҳақиқатан ҳам “Левофлоксацин” (антибиотик) дорисидан ичган. Шундан сўнг у ўзини ёмон ҳис қилган. 15-20 минутдан сўнг шифокорлар унга ёрдам берди. У ўзига келди. Шифокорлар юрак уриши, қон босими нормада эканини айтди, дейди синглиси.
Марҳума дори қабул қилганидан сўнг унда тутқаноқ кузатилгани ҳақида айтилган. Бироқ синглиси буни инкор этди. Шунингдек, опаси ушбу дорини илк марта ичмаганини, аввал ҳам ичганини, ҳатто ўзи ҳам у билан бирга ичганини таъкидлади ва вафотига антибиотик сабаб эмаслигини айтмоқда.
“Дарё” мухбири йиғган маълумотга кўра, “Левофлоксацин” (антибиотик) дориси Соғлиқни сақлаш вазирлиги ҳузуридаги Фармацевтика маҳсулотлари хавфсизлиги маркази давлат муассасаси томонидан рўйхатдан ўтказилган.
Изоҳ (0)