Ҳуқуқ-тартибот идоралари томонидан кўрилган зарур чора-тадбирлар натижасида Қирғизистондан олиб келинган психотроп ва кучли таъсир қилувчи дори воситаларининг ноқонуний айланмасига чек қўйилди. Бу ҳақда ЎзА хабар берди.
Жумладан, Андижон вилоятининг Олтинкўл туманида ўтказилган тезкор тадбирда Nexia автомашинасида йўловчи сифатида ҳаракатланаётган, Андижон шаҳрида яшовчи, 1970 йилда туғилган, муқаддам судланган фуқаро Д.Ж. аниқланиб, унга тегишли 1 дона полиэтилен қопда бўлган 1037 дона “Тропикамид” ва 224 дона “Регапен” кучли таъсир қилувчи дори воситалари процессуал тартибда расмийлаштириб олинди.
Шунингдек, унинг яшаш хонадонидан ҳам 1778 дона “Регапен” ҳамда таркибида психотроп модда бўлган 500 дона “Соннат” дори воситалари ашёвий далил сифатида олинди. Ушбу дори воситалари Қирғизистондан олиб келинган.
Фарғона вилоятида Қирғиз Республикасидан “Риштон” чегара-божхона пости орқали кириб келган, Ўзбекистон туманида яшовчи, 1975 йилда туғилган, муқаддам бир неча маротаба судланган Н.Г. бошқарувидаги Nexia автомашинаси тўхтатилиб, холислар иштирокида кўздан кечирилди Унда 3527 дона “Зардекс” кучли таъсир қилувчи дори воситалари борлиги аниқланиб, процессуал тартибда расмийлаштириб олинди.
Қўқон шаҳрида 1988 йилда туғилган У.Х. бошқарувидаги Bestune автомашинаси тўхтатилиб, холислар иштирокида кўздан кечирилган. Унинг салонида 3360 дона “Регапен” ва 1359 дона “Тропикамид” кучли таъсир қилувчи дори воситалари борлиги маълум бўлди.
Терговга қадар текширув давомида аниқланишича, мазкур дори воситалари ҳам Қирғизистондан олиб келинган.
Тошкент шаҳрида 1997 йилда туғилган фуқаро В.Ж. “Ўрикзор савдо комплекси” МЧЖ ҳудудида жойлашган савдо дўконларидан бирида, Қирғиз Республикасидан келтирилган, лекин, божхона ва сифатини тасдиқловчи ҳужжатлари бўлмаган, таркибида “Сибутрамин” кучли таъсир қилувчи модда бўлган жами 2153 дона турли хил маҳсулотларни келгусида сотиш мақсадида сақлаб келаётганлиги аниқланди.
Ҳозирда барча ҳолатлар юзасидан мазкур шахсларга нисбатан жиноят ишлари қўзғатилиб, тергов ҳаракатлари олиб борилмоқда.
Аввалроқ Фарғона вилоятининг Бувайда тумани, Хоразм вилоятининг Урганч шаҳри, Сурхондарё вилоятининг Олтинсой ҳамда Тошкент шаҳрининг Шайхонтоҳур туманларида кучли таъсир қилувчи дори воситалари савдоси фош этилган эди.
Ўзбекистонга йил бошидан буён 1 тоннадан ортиқ гиёҳванд моддалар олиб кирилиши олди олинганди.
Изоҳ (0)