21 август санасида хонанда Шаҳноза Отабоева 35 ёшни қарши олди. У мухлисларга “Оҳ, азизим”, “Фариштам онам” каби қўшиқлари билан яхши таниш.
![](/static/2024/08/21/photo_2024-03-11_11-14-12-1L0r9PpH-R11F3YCV.jpg)
— Аслида, келиб чиқишимиз Тошкент вилоятининг Пискент туманига бориб тақалади. Лекин бувим Сурхондарёда катта шифокор бўлгани учун ота-онам Сурхондарёда яшашган ва мен ўша ерда туғилганман. Лекин болалигим Тошкентда ўтган. Онам чиройли қўшиқлар айтадилар, лекин ўзлари ўқитувчилар. Санъатга қизиқиш онамдан ўтган. Агар шифокор бўлганимда, эплаб кетардим, деб ўйлайман. Ёки хонанда бўлмаганимда, яхши тикувчи бўлардим. “Оҳ, азизим” клипидан кейин мени стюардессаликка ҳам ишга таклиф қилишган. Бунга бўйим узунлиги сабаб бўлган бўлса керак.
Болалик хотиралари
— Мактабда онамнинг қўлларида таҳсил олганман. Ҳеч эсимдан чиқмайди. Ўша пайтларда фаррош учун синф фондига пул йиғиларди. Онам синф раҳбари бўлгани учун фаррош чақирмай, дарсдан кейин ўзлари синф хоналарини тозалаб чиқардилар. Мен ҳам шунда онамга ёрдам берардим. Таътил пайтларида уйда бекор қолмасин, деб “дом”имиз тагида кичкина столча қўйиб, писта ва қурт сотишимга шароит қилиб берарди. Меҳнатнинг айби йўқ. Кейинчалик клипларим телевидение орқали намойиш этила бошлаганидан сўнг қўшниларим “Анов писта-қурт сотадиган қўшни қиз артист бўлибди”, дейишган экан. Онам укам иккаламизни ёлғиз боши билан вояга етказганлар.
Озода Нурсаидовага ҳавас қилганман
— “Оҳ, азизим”ни Озода Нурсаидовага ўхшаб куйлаганман. Ўша қўшиқ чиққанидан кейин кўпчилик Озода янги қўшиқ айтибди, деб ўйлашган. Озода опамга тақлид қилиб-қилиб, ўзимни топганман. Чунки мен Озода бўла олмасдим, ўз йўналишимни топишим керак бўлган. Улар менга нафақат устоз, балки яқин опамдек бўлиб қолганлар.
Актёр Камол Бобоназаров билан турмуши
![](/static/2024/08/21/23421756_787106428146456_5331151168594771968_n-680x513-Ohbzjlxc-NuHLUiVm.jpg)
— Турмуш ўртоғим билан тўлиқ 3 йил яшадик. Кейин алоҳида яшадик. Бир ярим йилдан кейин фарзандларимиз ота-онасиз ўсмасин, деб яна ярашдик. Лекин яшаб кета олмадик. Ҳозирда қонунан ҳам, шаръий томондан ҳам ажрашганмиз. Ҳеч қайси аёл бахтли ва тўкис ҳаётда яшаса, у ҳаётини барбод қилиб, бошқа йўлга кетмайди. Мен қийинчилик кўриб катта бўлганман, фарзандларим ота-онасиз катта бўлишларини истамаганман. Балки менинг айбим — санъаткор бўлганимдадир. Чунки тўйлар, хизматлар сабаб кўп кўчада юрамиз. Шу сабаб ўртамизда келишмовчиликлар бўлди. Мен уйда ҳам эркак, ҳам аёл бўлиб яшашдан чарчадим. Неча йиллардан бери уйга фақат мен бозорлик қилиб келаман. Мен ҳам турмуш ўртоғим рўзғоримни қилиб беришини хоҳлайман.
Ортиқча вазн билан кураш
Хонанданинг айтишича, унинг ҳаётидаги стресслар ва асаббузарликлар ортиқча вазн тўплашига сабаб бўлган.
— Тўйдан олдин бирга ижод қилишни, хизматларга бирга чиқиб, мен қўшиқ айтиб, улар бошловчилик қилишларини режалаштиргандик. Кетма-кет фарзанд кўрдим. Ижодни ҳам оилам мустаҳкамлансин, деб ташлаб қўйдим. Тўйга, хизматларга бориб келардим керак бўлса. Бошида кўп қийинчиликлар бўлди. Яхши бўлиб кетар, деб курашдим. 27 ёшимда турмушга чиқиб, 28 ва 29 ёшимда кетма-кет фарзандли бўлдим. Асаббузарлик ва стресслардан семириб кетдим. Тарозидаги вазним 120 килога қараб кетди. Ҳар хил диеталар қилдим, дорилар ичдим. Умуман оза олмадим. Охири ошқозонимни кестириб 45 килога оздим.
![](/static/2024/08/21/photo_2022-07-23_19-38-52-535x600-535x600-lV4m7FRR.jpg)
Шаҳноза Отабоева вазни сабаб 5 йил саҳнага чиқмагани ҳақида
— Бу ишни ҳамма билди, чунки мен ҳеч кимдан беркитиб қилмадим. Биринчи навбатда яхши шифокор танлай олиш керак экан, сабаби бу сизнинг ҳаётингиз билан боғлиқ. Кўпчилик билан маслаҳатлашдим. Аёл киши фарзанд кўргандан кейин барибир семиради. Айниқса, COVID-19 дан кейин кўп ўзгаришлар бўлди, яшаш учун курашдик. Озарбайжондан келган шифокорга бордим ва жарроҳлик йўли билан озиш учун операция қилдирдим. Ўзимни жуда яхши ҳис қиляпман, чунки 5 йил саҳнадан қочиб юргандим. Вазним сабабли клип ололмадим, саҳнага чиқолмадим. Озиш учун ҳамма нарса қилдим, фойдаси бўлмади.
![](/static/2024/08/21/maxresdefault-JiwZrRbv-tP3JAc3h.jpg)
Жарроҳлик операциясидан олдинги ҳолати ва ундан кейин 35 кг вазн йўқотгани ҳақида
— Операция қилдириш ҳақида кўп аёлларга айтяпман. Санъаткор бўлганингиздан кейин шу ҳолат бўлса, кўпчиликдан қочар экансиз, одамлардан уяларкансиз. Дўконга киришим билан сизга мос ўлчамдаги кийим йўқ дейишлари кўнглимга тегарди. Бирор нарса тиктирсангиз, ярашмайди, ойнага қарагингиз келмайди, бу тўла вазнли аёлларимизда оддий ҳол. Шунақа воқеалар бўлган. Жуда қийналдим, стресс бўлди, бу ҳолатни бошдан кечирган одам билади. Мен 35 кг вазн ташладим, яқинда бориб шифокор кўригидан ўтгандим. Ҳозир ўзимни жуда енгил ҳис қиляпман, худди 15 йил олдинги, клипимдаги стюардесса кўринишида бўлган Шаҳнозага қайтгандекман. Бу реклама эмас, ўзим бошдан кечирганим учун буни кўпчиликка тавсия қилдим. Кўпчилик Instagram саҳифамда 5-6 ойдан бери мени кузатиб келади, айримлари худди шу жарроҳлик операциясини қилдирди ва менга раҳмат айтди.
![](/static/2024/08/21/photo_2022-07-23_18-09-14-680x367-680x367-lrdDEjNF.jpg)
Ажрашишига нима сабаб бўлган?
— Эркак ўз аёлини беномусликда, дилозорликда айбласа, оиласини уйсиз қолдирса чидай олмас экансиз. Яшаб ўтирган уйимизни сотиб юборган, пули эса йўқ бўлиб кетган. Мана шу нарсалар мени кучли қилди. Мен ўшанда икки болам билан бировнинг “тараканхонасида” яшадим. Майли, уйни сотиб юбординг, лекин аёлинг ва болаларингни ижарага олиб чиқиш йўлини қилсанг бўларди-ку. Лекин турмуш ўртоғим кимнидир топиб, мени тўла ҳолимда икки болам билан шундоқ ботқоққа улоқтириб кетди. Яқинда шундай ҳолат бўлди: болам отамни соғиндим, деди. Телефон қилсак ҳар доим “Ишим бор ҳозир, болам” жуда бўлмаса “Ҳозир пулим йўқ, пулим бўлганида бораман”, дейди. Лекин кейинчалик эшитдимки, ўшанда бир аёлнинг офисида уни кутиб ўтирган экан.
Изоҳ (0)