37 ёшли Фаҳрие Эвжен нафақат машҳур турк актёри Бурак Ўзчивитнинг рафиқаси, эридан кам бўлмаган қизиқарли шахс ҳамдир. Оқила ва чиройли Фаҳрие болалигиданоқ ўзининг меҳнаткашлиги билан ажралиб турган.
Фаҳрие Эвжен: биография
Актриса 1986 йил 4 июнда туғилган. Ота-онаси Ҳатиче ва Рамазан Эвжен Германиянинг ғарбида жойлашган Золлинген шаҳрида яшаган. Онаси — черкес, отаси эса Салоники шаҳридан қочган турк муҳожири эди.
Фаҳрие уларнинг тўртинчи, энг кичик қизи бўлган: опалари Айше, Демет ва Неше доим синглисини қўллаб-қувватлаган, уни ҳеч кимга хафа қилдиришмаган.
“Мени ҳеч қачон ортиқча эркалатишмаган. Болалигимда эртакдаги малика каби ҳаёт кечирганман деб айта олмайман. Албатта, энг кичиги бўлганим сабабли кўплаб нарсаларга рухсат беришган. Опаларимни жуда яхши кўраман, улар учта! Ҳар бири билан алоҳида муносабатда бўлганман, лекин ҳеч қачон эркатой, тантиқ бола бўлмаганман”, — дейди турк актрисаси енгил табассум билан.
Аммо унинг болалик йилларида қайғу билан эслайдиган воқеалар ҳам бор. 90 йиллар бошларида Германияда муҳожирларнинг кескин кўпайиши сабабли неонационалистик ҳаракатлар авж олади. Қизнинг айтишича, 7 ёшида оила ҳаётини сақлаб қолиш учун ертўлада яширинишга мажбур бўлган. Ҳатто ҳозир ҳам бу мавзу тилга олиниши билан актрисанинг кўз олдига турк оилаларининг ёнаётган уйлари келади. Улардан беш нафари ҳалок бўлган, ўн тўрт нафари жароҳатланган.
Тез орада намойишлар тўхтайди, жиноятчилар қамоққа ташланади, ҳаёт ўз изига тушади. Фаҳрие мактабга боради, билимларни завқ билан ўзлаштиради. У тил ўрганишни ёқтирарди (ҳозирги пайтда актриса немис, испан ва инглиз тилларида эркин гаплаша олади), бундан ташқари отаси қизлари илдизларини билишлари керак деб ҳисоблагани учун дастлабки тўрт йил пухта тарзда турк тилини ўрганиш учун сарфланади.
Ўша пайтда Фаҳрие ҳаётини актрисалик билан боғлаш ҳақида ўйламаган ҳам. Аммо қизалоқ уйда картондан ясалган микрофонда қўшиқ куйлаб, ўзи ёзган қўшиқлари билан саҳнада чиқишни тасаввур қилишни ёқтирарди.
Ўрта ва катта синфларда ўқиётганда мактаб спектаклларида қатнашишни бошлайди, у бу нарсаларга ҳобби сифатида муносабатда бўлади. Баскетбол, рақс, кикбоксинг ва адабиёт клубига ҳам қатнашишни канда қилмасди — клубда ҳар ҳафта ўқилган китоблар муҳокама қилинарди.
Эвжен фалсафа ва социологияни алоҳида қизиқиш билан ўргана бошлайди: 19 ёшида у Гейне номидаги Дусселдорф университетининг социология факультети талабаси бўлади.
Ёзги таътилларининг бирини қизлар онаси билан бирга Истанбулда ўтказишга қарор қилади. Айнан шу ерда талаба қизнинг тақдири ўзгаради: Фаҳрие телевидение ходимларининг эътиборини тортади, улар қизнинг ёқимтой ташқи кўринишига мафтун бўлиб, уни “Ҳеч қачон унутма” кинокартинаси устида иш олиб бораётган режиссёр Ўзер Кизилтанга тавсия қилишади.
Кино синовлардан ўтган қизнинг олдида икки йўл бор эди: университетдаги ўқишини тўхтатиш ёки бундай кутилмаган таклифлардан воз кечиш. У ўзи тўғри деб ҳисоблаган йўлни танлайди ва ўзини ўқишни ҳар қандай ёшда давом эттириши мумкинлигига ишонтиради (натижада Эвжен 2014 йилда Босфор университетининг тарих факультетини тамомлайди).
Сериал машҳур бўлмаган бўлса-да, Фаҳрие учун бу янги ҳаётга чипта бўлади. Машҳур продюсерлар унга рад этишнинг иложи бўлмаган жозибали таклифлар юборишни бошлайди.
Ёрқин роллари
“Тўкилган япроқлар”
2006 йилдан 2011 йилгача намойиш этилган ушбу сериал Эвженнинг фильмографиясидаги биринчи муҳим лойиҳа ҳисобланади. Унда оилавий қадриятлар, фарзандлар ҳақида қайғуриш ва қийин танловлар ҳақида сўз боради.
“Тўкилган япроқлар”да умрининг кўп қисмини ҳалол меҳнат қилиб, муносиб мансабга эга бўлган етук инсон, оила бошлиғи Али Ризони учратамиз. Бироқ бу ўзини бахтли инсон сифатида ҳис қилиш учун етарли эмас. Хотини Хайрие ва беш нафар фарзанди – Айше, Нежла (Фаҳрие ўйнаган), Фикрет, Лейла ва Шевкет бўлишига қарамай, қаҳрамон ўз авлодларига ҳаётнинг асл маъносини тушунтириш, иш жойини ўзгартириш ва машаққатни бошидан кечиришда қийналади.
Бу тўсиқлар оила ўз уйи жойлашган Трабзонни ташлаб, бошқа бир ёввойи ҳаёт қайнаётган улкан Истанбулга йўл олишга мажбур бўлгандан кейин пайдо бўлади.
“Чолиқуши”
Айнан мана шу сериалда ҳақиқий юлдузли актёрлар таркиби тўпланади. Унда Фаҳрие Эвжен, Бурак Ўзчивит, Ҳанде Эрчел, Дениз Чакир, Пинар Чағлар Генчтурк ва бошқалар асосий ролларни ижро этган. Рашот Нури Гунтекин романининг экранизациясида ота-онасидан эрта айрилган бош қаҳрамон Фериденинг мураккаб ҳаёти ҳикоя қилинади.
“Курт Сейит ва Александра”
Мазкур фильмда балда рус зодагон аёли Александра Юлиановна Верженскаяни севиб қолган чор армиясининг офицери Курт Сейит Эминов (Киванч Татлитуғ) ҳақида ҳикоя қилинади.
Фильмда Фаҳрие ажойиб ижроси билан томошабинларни мафтун қилади, у Сейитга пинҳона ошиқ бўлган Мюрвет (Мурка) исмли қиз ролини ўйнайди.
“Севги сенга ўхшайди”
Ушбу сериалда актриса келажакдаги турмуш ўртоғи Бурак Ўзчивит билан бирга суратга тушган. У денгиз кенгликлари ва балиқ овлашни севувчи Али ролини ижро этган. Эркак учун севимли ишидан муҳими йўқ — қишлоқдаги гўзал Дениз пайдо бўлмагунга қадар. Қиз кичик кафеда музқаймоқ сотувчи бўлиб ишга киради. Қаҳрамонларнинг тақдир тақозоси билан учрашуви олдиндан белгиланганди.
Фақатгина Алининг бундай ҳис-туйғуларни ҳеч қачон бошдан кечирмагани сабабли у кўплаб муаммолар билан тўқнаш келади.
Янги лойиҳалар
“Алп Арслон: Буюк Салжуқий”
2020 йилдан 2023 йилгача турк сериали мухлислар Салжуқийлар империясини (1063—1072 йиллар) бошқарган саркарда Алп Арслон ҳақида ҳикоя қилувчи ҳарбий-тарихий сериални завқ билан томоша қилди.
Унда асосий ролларни Бариш Ардуч ва Лейла Лидия Туутлу ўйнаган. Фаҳрие иккинчи даражали характерга эга бўлган — Акча ролини ижро этган.
Фаҳрие Эвжен ҳақида қизиқарли фактлар
- Актриса “Менинг уйим сенсан” фильмининг суратга олиш вақтида ўзидан 14 ёш катта бўлган машҳур актёр Ўзжан Дениз билан танишиб, бир йил давомида у билан учрашиб юрган. Севишганлар деярли турмуш қурай деганида Дениз актрисага модел Бусе Наржи билан хиёнат қилган.
- Фаҳрие бир неча марта мода нашрларининг биринчи саҳифаларида чиққан бўлиб, энг чиройли турк актрисаларидан бири деб эътироф этилган. Шунингдек, мухлислар актриса Моника Беллуччига ташқи кўриниш жиҳатидан жуда ўхшашлигини таъкидлашган.
- Юлдуз ўзининг энг ёмон сифати сабрсизлигини айтади, бироқ озгина дам олиш ва ҳаёт ритмини ушлаш учун у эрта тонгда ёки кечқурун сайрга чиқади — у ёлғиз қолганида хатти-ҳаракатлари ҳақида яхшилаб ўйлаб олиш мумкин деб ҳисоблайди.
- Фаҳрие ўқишни яхши кўради. Севимли асари сифатида у Пауло Коэльонинг “Ёруғлик жангчиси китоби” романини тилга олади ва парвоз вақтида илмий мақолалар ёзилган журналларни варақлашни афзал кўради.
- Актриса “Қуллик учун қасос” сериалининг ҳар бир қисми учун тахминан 40 минг лира (1300 доллар) гонорар олган. Шу тариқа турк кино саноатида турк актрисалари орасида биринчи бўлиб эркак ҳамкасбларидан юқори гонорар олган актрисага айланади.
- Актриса ўзи катта бўлгани каби кўп болали оиласи бўлишини хоҳлайди.
- Эвжен ўзини қатъий парҳезлар билан чекламайди. У гўштдан воз кечган, асосан сабзавотлар истеъмол қилади ва кунига камида икки литр оддий сув ичади.
- Пластик жарроҳларнинг таъкидлашича, кино юлдузи ринопластика қилдирган — бурнининг орқа қисми аввалгига нисбатан торайтирилган.
- Актриса “Элвин ва бурундиқлар 2” фильмидаги бурундиқ Жанетга овоз берган.
- Турк актрисаси “Cарпе диэм” шиорига амал қилган ҳолда яшайди, бу лотин тилидан таржима қилинганда “Айни лаҳзадан лаззатлан” деган маънони англатади.
Изоҳ (0)