Uyda unutib qoldirilgan bolakay haqidagi rejissyor Kris Kolambusga tegishli mashhur komediyani ko‘rmagan odamni uchratish qiyin. Filmdagi nafaqat hazil-mutoyiba va rang-barang voqealar mashhur, balki film suratga olingan joylar ham diqqatga sazovor hududlarga aylangan.
Film 1990-yilda ekranlarga chiqqaniga qaramay, “Uyda yolg‘iz” suratga olingan joylar hozirgi kunga qadar minglab sayyohlarni o‘ziga jalb qilib kelmoqda. Bugun mazkur afsonaviy komediya suratga olingan 3 ta eng qiziqarli manzillar haqida ma’lumot beramiz.
Makkalisterlar oilasiga tegishli uy: 671 Linkoln Avenyu, Uinnetka, Illinoys
Kevin (Makoley Kalkin)ni ko‘cha o‘g‘rilaridan mohirlik bilan himoya qilgan Makkalisterlar uyi Chikagoda joylashgan bo‘lib, 1920-yillarda qurilgan. 400 kvadrat metrlik bino diqqatga sazovor joylardan biri hisoblanadi. Xonadon 1990-yildagi film muvaffaqiyatidan keyin birinchi marta sotuvga qo‘yilgan. 2012-yilda uy 1,58 million dollarga sotilgan.
Hozirda mazkur uyda xonadonni besh yarim million dollarga xarid qilgan oila istiqomat qiladi. Kevinning uyi Illinoys shtatidagi eng ko‘p tashrif buyuriladigan sayyohlik joylaridan biri hisoblanadi.
Aeroport sahnalari: O’Hara xalqaro aeroporti, Chikago
Makkallisterlar oilasi Parijga jo‘nab ketishdan avval aeroportga shoshilayotgan sahnani haqiqiy aeroportda suratga olishgan. Chikagodagi O’Hara aeroporti reysga hovliqayotgan qarindoshlar Kevinning yolg‘iz qolganini sezib qoladigan sahnalar tasvirga olingan joy hisoblanadi.
Rojdestvo sovg‘alari do‘koni: Plaza mehmonxonasi, Nyu York
Filmdagi asosiy voqealar Uinnetka qishlog‘ida sodir bo‘ladi, ammo ayrim sahnalar Nyu Yorkda suratga olingan. Masalan, eng mashhur va qimmatbaho bo‘lgan Plaza mehmonxonasi shular jumlasidandir. Manhetten markazidagi hashamatli mehmonxona AQSHdagi eng nufuzli joylardan biri bo‘lib, filmning ikkinchi qismida namoyish etilgan.
Plaza bugungi kunda Nyu Yorkning arxitektura yodgorligi hisoblanadi. 1978-yilda binoga milliy va tarixiy yodgorlik maqomi berilgan. U 1907-yilda ochilgan bo‘lib, bu yerda AQSH prezidentlari, qirollik oilalari aʼzolari va taniqli shaxslar yashagan va hozir ham shu yerda qolishadi. Har bir xona billur qandillar, marmar pollar, ko‘plab oltindan yasalgan dekoratsiyalar bilan to‘ldirilgan. Derazadan markaziy bog‘ni tomosha qilish mumkin.
Izoh (0)