YouTube тармоғида марҳум актриса Ҳалима Ибрагимованинг сўнгги интервьюларидан бири эълон қилинди.
— Ҳаёт ҳеч қанақасига феъл-атворимни ўзгартиролмади. Тоғни ўзгартирса бўлади, аммо феъл-атворни ўзгартириб бўлмайди, деб бежиз айтишмаган экан. Шундай бўлишимга одамлар мажбур қилган, деб кўп айтаман. Ҳақиқатан ҳам шундай. Ота-она ўлганидан кейин ҳатто қариндошлар ҳам ўзини четга оларкан. Ёрдам берганлар ҳам бўлди, аммо ҳаммалари ҳақида ундай деёлмайман. Аммо энг алам қилгани — ишинг юришиб кетганидан кейин улар яна атрофингда тўпланишади.
“Ҳар куни тўйга чиқмайди, қаердан шунча пули бор”, деб кўпчилик қизиқади. Аммо уларнинг ҳеч бири ўтмишимни билишга қизиқмайди. Кичкина сумканинг ичига кичик ёстиқ, тиш чўткаси билан пастани солиб, кунига бор-йўғи бир-икки соат ухлаб, машинанинг ичида ётиб, бозорда савдо қилганман. Мени боримча қабул қилинг. Мен ойнайи жаҳонда бошқача, уйда бошқача инсон эмасман. Қандай кўринсам, шундайман.
“Агар отам тирик бўлганида, санъаткор бўлмасдим”
Суҳбат давомида актриса бундан 28 йил аввал вафот этган отасини қуйидагича хотирлаганди.
— Отам раҳматли 28 йил аввал вафот этган. Аммо шунча йил ичида бирор марта отамни эсламай яшаган куним бўлмади. Уйимнинг тўрида каттакон портретларда ота-онам қараб туришади. Ҳар куни уларни эслайман. Болаларимни ҳам мозорга олиб бориб, бобо ва бувисининг қабрларини зиёрат қиламиз.
Агар ота-онам вафот этишмаганида, мен 4-5 та боланинг онаси бўлиб, бугун қуда-андали бўлиб, уйда ўтирадиган аёл бўлардим. Учта институтни тамомлаганман, агар отам тирик бўлганида, санъаткор бўлмасдим.
“Ҳалиманинг оғзини ёп”
Актрисанинг “Ўғирланган ниқоб” шоусида иштирок этгани ва иштирокчиларни сенсирагани кўплаб муҳокамаларга сабаб бўлганди.
— Бу борада кўп гап эшитганман. Ҳатто устимдан шикоят қилиб, юқори ташкилотларга ҳам ариза ёзишган. “Ҳалиманинг оғзини ёп” дейишган пайтда телеканал раҳбарияти шоу мен борлигим учун интригали бўлаётгани ҳақида айтганди. Иштирокчилардан бирига “мол” деганман, тўғри, чунки у сигир ниқобида саҳнага чиққанди.
Мен одамларнинг асабига тегмайман, шунчаки ўзимни тутишим, гапиришим шундай. Илгари негативларга эътибор бериб, ҳатто Instagram’даги профил эгаларини ҳам топиб, уришиб-жанжаллашиб юрардим. Ҳозир бундай қилмайман.
“Безорилик учун судланганман”
Актриса илк марта бир неча бор судлангани ҳақида гапирганди.
— Мен ўзимдан кучсиз одамга тегмайман. Уйдан бир сўм олиб чиқмай, фақат олиб кирадиган одатим бор эди. Қора бозорда ишлаётганимда ҳам пулсиз кетардим. Тушлигим, кунлик харажатимдан ташқари яхшигина фойда ҳам қоларди. “Стоянкачи” ўзгарган, эски ишчилар мени яхши танишарди. Янги ишчи жума куни, машина бозорда одам кўпайган куни пулини кириш олди бермасам “Хизмат кўрсатиб қўйибсан-у”, деб ҳақорат қилди. Нима хизмат кўрсатиб, деб бориб уриб кетганман. У пайтлари камерали телефонлар энди чиққан пайтлари эди, кимдир сёмка қилиб тарқатиб юборган. Мен санъат институтида ўқирдим. Роса шов-шув кўтарилганди. Ўшанда қанд касаллиги қанчалар ёмонлигини тушунганман. Эркакнинг саломатлиги ёмонлашиб, оғзи оқариб, кўпириб кетганди.
Безорилик қилганим учун жавобгарликка тортилганман, судланганман. Тегмаганга тегмайман, аммо ноҳақ тегинганни соғ қўймайман.
“Озода Нурсаидовани яхши кўрмайман”
Бошловчининг “Озода Нурсаидовани яхши кўрасизми?” деган саволига актриса қуйидагича жавоб берганди.
— Озодани яхши кўрмайман. Чунки у қувончли кунимда яхши гап гапирмай кетган. Ўғил фарзанд кўрганимда бешик тўйига келиб, микрофонда жуда хунук гаплар гапирганидан кейин кўнглимни синдирган.
Мен Юлдуз Усмонова билан ишлаб кетганим ғашини келтирган. Примадоннага аввалдан Озода Нурсаидованинг ёнида юриб, қўшиқларини эшитиб, ойлигимни олиб юрганим ҳақида айтганман. Озоданинг нон-тузини еганман, аммо оиламга аралашишга ҳеч кимнинг ҳаққи йўқ. Ҳалима “кўча”, уйда у оддий келин, она ва турмуш ўртоқ. Шахсиятимга аралашишга ҳеч кимнинг ҳаққи йўқ.
“Юлдуздан қўрққанинг учун ёнида юрибсан”
Бошловчи “Юлдуз Усмонова хафа қилмайдими?” деган саволига актриса қуйидагича жавоб берганди.
— Юлдуз опам тўғрисўзликни яхши кўради. У жуда кўп одамларнинг ичида юрган одам. Унинг миллионлаб мухлиси бор, ҳатто душмани ҳам уни эшитади. Баъзилар “Юлдуздан қўрққанинг учун ёнида юрибсан”, дейишади. Менга одамларнинг гапи қизиқ эмас. Биринчидан, Юлдуз Усмонова олдига ишончли одамни олади, иккинчидан, у Озодадан кетганим учун “кел ёнимга” деган жойи йўқ. Озода билан муносабатларимиз узилганидан 2-3 йил ўтганидан кейин жиянимнинг тўйига Юлдуз Усмоновани чақирганман. У мени Озоданинг синглиси деб ўйларкан. Гаплашиб, бир-биримизни тушунганимиз учун оилавий дўст бўлиб кетганмиз.
Изоҳ (0)