Ипотека Банк OTP Group Ўзбекистоннинг энергия сектордаги фаолиятини кучайтириб, Ўзбекнефтегаз билан 60 миллион долларлик кредит келишувини имзолади. Уч йиллик айланма маблағлар учун мўлжалланган мазкур молиялаштириш Ўзбекистоннинг йирик нефть ва газ компанияларидан бири бўлган Ўзбекнефтегазнинг иш фаолиятини қўллаб-қувватлашга, шунингдек, мамлакатдаги иқтисодий ислоҳотларни мустаҳкамлашга хизмат қилади, деб таъкидлади Ипотека Банкининг бошқарув аъзоси маслаҳатчиси Иракли Элашвили “Дарё”га берган интервьюсида.
“Бу молиялаштириш келишуви Ўзбекистондаги иқтисодий ислоҳотларни янада ривожлантиришга ҳисса қўшади”, — деди Ипотека Банк OTP Group Бошқаруви маслаҳатчиси Иракли Элашвили. “Биз Ўзбекнефтегаз АЖнинг энг йирик маҳаллий хусусий банк шеригига айланганимиздан фахрланамиз”.
Ўзбекнефтегаз ва унинг Ўзбекистон энергия сектордаги роли
1992 йилда ташкил этилган Ўзбекнефтегаз Ўзбекистон энергетика тизимида муҳим ўрин тутади. Компания углеводородларни қазиб олиш, нефть-кимё маҳсулотларини ишлаб чиқариш ва қайта ишланган нефть маҳсулотларини экспорт қилишга ихтисослашган. Элашвили таъкидлашича, компаниянинг Эуобонд чиқариш орқали намоён этган юқори даражадаги шаффофлиги уни Ипотека Банк учун идеал ҳамкорга айлантирган.
“Ўзбекнефтегаз Ипотека Банк учун янги мижоз, аммо бозорда жуда муҳим ўринга эга ўйинчи”, — деди Элашвили. “Уларнинг молиявий шаффофлиги ажойиб ва бу бизга ушбу ҳамкорликка нисбатан катта ишонч бағишлайди. Бу битим шунингдек, ОТП Гуруҳи томонидан барча транзакцияларга нисбатан қўлланиладиган юқори стандартларни акс эттиради”.
У қўшимча қилди: “Биз Ўзбекнефтегазнинг эҳтиёжларини чуқур ўрганиш учун улар билан яқиндан ҳамкорлик қилдик ва ушбу кредитни уларнинг айланма маблағ эҳтиёжларини қўллаб-қувватлаш учун мослаштирдик. Янги йил арафасидаги шундай банд даврда ушбу битимни якунлаш барча томонлар учун катта ютуқ бўлди”.
Диверсификация ва келажакдаги мақсадлар
Ушбу кредит Ипотека Банкнинг жорий йилдаги энг йирик битимларидан бири бўлиб, турли соҳаларда фаолиятни диверсификация қилишга қаратилган саъй-ҳаракатларининг бир қисмидир. “Энергетика иқтисодиёт учун муҳим соҳа бўлиб, биз уни қўллаб-қувватлашни давом эттириш ниятидамиз”, деди Элашвили. “Бироқ, бошқа соҳаларда ҳам қизиқарли лойиҳаларимиз бор, улар ҳақида янги йилда маълумот берамиз. Секторлар бўйича фаолиятни диверсификация қилиш банк учун устувор йўналиш бўлиб қолади”.
Ипотека Банкининг келгуси режалари ҳақида сўралганда, Элашвили шундай деди: “Бу кредит яшил молиялаштириш билан боғлиқ эмас, аммо биз бутун дунё бўйлаб энергия компанияларининг барқарорлик сари ўтишга бўлган қизиқиши ортиб бораётганини кузатмоқдамиз”.
Ўзбекистон иқтисодий ўсишида хусусий секторнинг роли
Элашвили хусусий ва халқаро ўйинчиларнинг Ўзбекистондаги хусусийлаштириш жараёнини қўллаб-қувватлашдаги аҳамиятини таъкидлади. “Ўзбекистоннинг хусусийлаштириш жараёни иқтисодий ўсиш учун муҳим аҳамиятга эга. Бозордаги илк халқаро молиявий институт сифатида, OTP Group глобал тажриба ва мижозларни қатъий баҳолаш стандартларини олиб кирмоқда, бу нафақат мижозларимизга, балки бутун иқтисодиётга фойда келтиради”, — деди у.
Ўзбекистон бозорида янада кўпроқ хусусий банклар бўлиши зарурлиги ҳақидаги саволга жавоб бериб, Элашвили шундай деди: " Ўзбекистонда янада кўпроқ хусусий ва халқаро банклар мавжуд бўлиши, бизга биргаликда катта лойиҳаларни молиялаштиришимизга имкон беради. Ғарбий мамлакатлардаги тажрибамиз ва стандартларимиз билан биз бозорни янада рақобатбардош ва глобал тизимга мос келадиган молиявий тузилишга айлантиришга ёрдам бермоқдамиз”.
Шунингдек, у рақобатнинг афзалликларига ишора қилди: “Биз ғарбий давлатлардаги тажриба орқали Ўзбекистон молия секторини глобал стандартларга мослаштиришга ёрдам бераяпмиз. Бозорда янада кўпроқ хусусий ва халқаро ўйинчиларнинг мавжудлиги иқтисодиёт учун фойда келтиради ва бозорда шаффофликни оширади”.
Келажакдаги режалар ва янги имкониятлар
Ипотека Банк Ўзбекистоннинг иқтисодий ривожланишига кўмаклашишда ўз мажбуриятларига содиқ қолади. “Бу битим бизга янги йилда мустаҳкам старт бериш имконини беради”, — деди Элашвили. “Биз ушбу суръатни сақлаб қолиш ва мамлакат иқтисодий ривожланишига янада кўпроқ ҳисса қўшишдан хурсандмиз”.
Интервьюни томоша қилинг:
Изоҳ (0)