Яқин Шарқдаги вазият АҚШ туфайли назоратдан чиқиб кетди ва энди фалокатга айланиш хавфи бор, деди АҚШ собиқ президенти Дональд Трамп Truth Social ижтимоий тармоғида.
“АҚШ Яқин Шарқнинг бутунлай назоратдан чиқиб кетишига йўл қўйди. Ҳақиқатан ёмон ишлар содир бўлмоқда, аммо биз ҳаммасини тўхтатишга қодирмиз. Агар куч ва аниқлик билан ҳаракат қилинмаса, фалокат юз бериши мумкин”, — деб ёзган Трамп.
Унинг фикрига кўра, бу ҳолат Украинадаги урушга ҳам тааллуқли, “ҳатто, кўпроқ даражада”. Москва махсус операциянинг барча мақсадларига эришилишини таъкидламоқда.
Аввалроқ Трамп АҚШнинг амалдаги президенти Жо Байден маъмуриятини Яқин Шарқдаги муваффақиятсиз сиёсатда айблаган эди, унинг фикрича, Исроил ва ҲАМАС ўртасидаги уруш шу сабабдан бошланган. Собиқ президентнинг фикрича, урушга Американинг Эронга нисбатан санкциялари юмшатилгани сабаб бўлган: Теҳрон нефть сотишдан катта фойда олган.
“Мамлакатимиз ҳозир катта мағлубиятга учради. Бутун дунё устимиздан куляпти”, — деганди Трамп ноябрь ойида.
Исроил ва Фаластиннинг ҲАМАС ҳаракати ўртасида уруш бошланганидан кейин Қўшма Штатлар Тель-Авивни қўллаб-қувватлашини билдирди ва унга молиявий ва ҳарбий ёрдам кўрсатишда давом этмоқда. Айни пайтда Ироқ ва Суриядаги АҚШ ҳарбий базалари ва коалиция кучларига ҳужумлар тез-тез кузатилмоқда. Ноябрь ойи ўрталарида Пентагон ўша пайтда Америка нишонларига 55 марта ҳужум қилингани, 50 дан ортиқ ҳарбий хизматчи яралангани ҳақида хабар берганди.
Пентагон матбуот котиби Патрик Райдер ҳарбий базаларга қилинган ҳужумларни “кичик кўламли”, аммо “безовта қилувчи ва хавфли” деб атади. Тҳе Washington Post нашрининг ёзишича, ҳозирда Ироқда 2 500 га яқин, Сурияда эса яна 900 га яқин америкалик аскар қолган.
Изоҳ (0)