Бангкокда бўлиб ўтаётган Осиё-Тинч океани иқтисодий ҳамкорлиги (ОТИҲ) саммити доирасидаги савдо вазирлари учрашувида Россия иқтисодий ривожланиш вазири Максим Решетников нутқ сўзлаётган пайтда АҚШ, Канада, Янги Зеландия, Япония ва Австралия вакиллари залдан чиқиб кетди. Бу ҳақда Meduza хабар бермоқда.
Ўз исмини ошкор қилмаган дипломат беш мамлакат вакиллари «Россиянинг Украинадаги ноқонуний тажовузкор уруши ва унинг ОТИҲ минтақасидаги иқтисодий оқибатлари»га қарши норозилик белгиси сифатида учрашувни тарк этганини айтган.
Яна бир дипломатнинг сўзларига кўра, норозиликни уюштирган беш мамлакат 22 май куни эълон қилинадиган ОТИҲ якуний баёнотида «урушга нисбатан янада қатъийроқ таърифлар» қўлланилишини истаган.
Таиландлик мансабдорнинг айтишича, беш мамлакат делегациялари Решетниковнинг нутқи тугаганидан кейин учрашувга қайтиб келган.
Кейинроқ АҚШнинг маърузаси чоғида Россия делегацияси учрашувдан чиқиб кетган.
Осиё-Тинч океани иқтисодий саммити 1989 йилда тузилган бўлиб, унга Австралия, Бруней, Вьетнам, Гонконг, Индонезия, Канада, Хитой, Малайзия, Мексика, Янги Зеландия, Папуа-Янги Гвинея, Перу, Сингапур, АҚШ, Таиланд, Тайван, Филиппин, Чили, Жанубий Корея ва Япония киради. Россия ОТИҲга 1998 йилда қўшилган.
Мавзуга доир:
- АҚШ ва Россия мудофаа вазирлари Украинада уруш бошланганидан бери илк бор музокара ўтказди. Пентагон Украинадаги ҳарбий ҳаракатларни зудлик билан тўхтатишни сўрамоқда
- Байден Путинда ҳозир Украинадаги урушдан чиқиш режаси йўқлигидан хавотир билдирди
- Март ойида АҚШдан Россияга товарлар етказиб бериш беш баробарга камайди
Изоҳ (0)