АҚШ ҳарбий ёрдам доирасида Украинага етказиб беришни ваъда қилган баъзи қурол-яроғ ва ўқ-дорилар захираларининг камайиши муаммосига дуч келди. Бу ҳақда CNN ҳукуматдаги бир нечта манбаларига таяниб хабар берди.
Хусусан, гап 155 миллиметрли артиллерия ўқ-дорилари ва Stinger кўчма зенит-ракета мажмуалари ҳақида бормоқда. Шунингдек, CNN манбалари фикрича, Украинага ваъда қилинган бошқа қурол-яроғларни ишлаб чиқариш билан боғлиқ қийинчиликлар ҳам юзага келиши мумкин, масалан, Javelin танкка қарши кўчма ракета мажмуалари ҳамда ҲАРМ ва GMLRS ракеталари.
Ҳозирча захиралари қисқариб кетган қуроллар ва ўқ-дорилар ишлаб чиқаришни тезкорлик билан йўлга қўйиш, шунингдек, уларни Европадаги иттифоқдошларидан сўраш имконияти бўлмаяпти.
Шу билан бирга, АҚШ ҳукумати ҳеч қандай шароитларда мамлакат хавфсизлиги таҳдидга юз тутмаслигини ҳамда қурол етказиб беришда бунинг АҚШ стратегик захираларига ва мудофаа режаларига таъсири ҳисобга олинишини таъкидламоқда.
Украинада уруш бошланишидан олдин, деб ёзади CNN, АҚШ кўп йиллардан буён биринчи марта ҳеч қандай қуролли низога аралашмаётган эди — ўша пайтда Афғонистон ва Ироқдаги қўшинлар аллақачон олиб кетилган эди, катта кўламли урушда иштирок этиш учун қурол ишлаб чиқариш зарурияти эса бўлмаган.
«Бу тобора қийин бўлиб бормоқда», — дея CNN’га маълум қилди разведка бўйича қўмита аъзоси конгрессмен Майк Куигли Украинага қурол етказиб беришни изоҳлар экан. «Бу уруш бир неча кунда тугайди, деб ўйлагандик, энди эса бир неча йиллар давом этиши мумкин. Глобал етказиб беришлар занжири узилаётган бир пайтда, Ғарб бундай юқори даражадаги эҳтиёжларни қондиришга жуда қийналади», — деди у.
Ўз навбатида Пентагон матбуот котиби Патрик Райдер CNN’ни ишонтиришича, АҚШ Украинани «қанча талаб этилса, шунча» қўллаб-қувватлашда давом этади. Украинага қурол етказиб бериш ҳеч ҳам АҚШнинг мудофаа қобилиятини пасайтирмайди, дея қўшиб қўйди у.
АҚШ — Украинанинг асосий иттифоқчиларидан бири. Уруш бошланганидан экйин Америка Украинага бир неча марта кўп миллиардлик ҳарбий ёрдам пакетларини ажратди, шунингдек, у учун ижара ёки узоқ вақт бўлиб-бўлиб тўлаш шарти билан қурол-яроғ етказиб бериш имконини берувчи ленд-лиз дастурини ишга туширди.
Изоҳ (0)