Фоторепортаж: Ғарб Украинага қандай қуролларни ваъда қилмоқда?

Украинага ҳарбий ёрдам кўрсатиш бўйича алоқа гуруҳининг Рамштайндаги йиғилишида НАТО давлатлари Киевга қандай қуролларни жўнатишга тайёрлиги ҳақида ҳисобот берди. Асосий эътибор ҳаво ҳужумидан мудофаа қуролларига, шунингдек ҳарбий хизматчиларни ташиш учун мўлжалланган зирҳли транспорт воситалари(бронемашина)га қаратилмоқда. Биринчи марта Украинага Буюк Британия ва Францияда ишлаб чиқарилган танклар, шунингдек, АҚШ армиясининг асосий воситаси — Bradley бронемашиналари ваъда қилинди. Янги ҳарбий ёрдам пакетидан жой олган асосий қуроллар ҳақида «РБК» фоторепортаж тайёрлади.

Украинанинг муҳим инфратузилмасига берилган зарбалар фонида АҚШ Киевга Украина узоқ вақтдан бери сўраётган Patriot ҳаво мудофааси тизимларини ваъда қилди. Patriot батареяси электр станцияси, радарлар, ракеталарни бошқариш тизими, учириш мосламалари, антенна-мачта конструкцияси ва тутувчи ракеталардан (ПАC-2 ва ПАC-3) иборат. АҚШ Стратегик ва халқаро тадқиқотлар маркази маълумотларига кўра, ҳозирда битта батареянинг баҳоси тахминан 1,1 миллиард долларни ташкил этади.

Бундан ташқари, Украина Humwee йўлтанламас машиналарига ўрнатилган Авенгер зенит-ракета комплексларини, Британиянинг Старстреак аир дефенcе ҳаво мудофаа тизимларини, шунингдек, Украинага ўтган йили ҳам юборилган NASAMS (АҚШ ва Норвегия ҳамкорлигида ишлаб чиқарилган) ҳаво мудофаа тизимларини олиши керак. Бу сафар олтита NASAMS тақдим этилиши кутилмоқда.

Украина Қуролли кучларининг мунтазам равишда зирҳли транспорт воситаларидан айрилаётгани Ғарб давлатларини ҳарбийларни ташиш учун кўплаб бронемашиналар етказиб беришга мажбур қилмоқда.

Канада Украинага ўзи ишлаб чиқарган 200 та Сенаторъни юборишга ваъда берди. Машина соатига 110 км тезликка чиқа олади ва унга пулемёт ёки автоматик гранатани ортиш мумкин.

Бундан ташқари, Франциянинг Бастион машиналари Украинага келтирилиши мумкин, Париж илгари бу машиналарни Африкадаги можаро зоналарига юборган. Шунингдек, аввал Украина Қуролли кучлари томонидан турли йўналишларда фойдаланилган кичик танклар — Швециянинг Strf 90 ва Американинг М-113 машиналари Киевга етказиб берилиши мумкин.

Буюк Британия мудофаа вазири Бен Уоллес Украинага Буллдог бронетранспортёрларини юборишга ваъда берди. Ушбу машина Ироқ ва Афғонистондаги қуролли можаролар пайтида ишлатилган. Ишлаб чиқарувчиларнинг таъкидлашича, Исроилнинг Рафаэл зирҳлари туфайли машина қўлда отиладиган танкка қарши гранаталарга дош бера олади. Буллдог двигатели Rolls-Royce томонидан ишлаб чиқарилган.

АҚШ, ўз навбатида, Киевга 90 та Stryker бронетранспортёрларини ваъда қилди. Ҳозиргача Украинада ушбу машинанинг Канадада чиқарилган вариантлар мавжуд эди. Stryker оиласининг зирҳли машиналари Ироқда ишлатилган, аммо бошқа мамлакатлар армияларига деярли етказиб берилмаган.

Германия Украинага 40 та Marder пиёдалар учун жанговар машинасини етказиб беришга рози бўлди. Бу асосан Бундесвернинг омборларида сақланаётган машиналар бўлиб, улар янги эмас. Marder узоқ вақтдан бери ўзининг яхши ҳимояси билан танилган, аммо шиддатли жанговар ҳаракатлар шароитида бу машинадан камдан-кам фойдаланилган. Аввал Marder’ларнинг бир қисми Афғонистондаги немис контингентига юборилганди.

Британия ва Уммон армияларининг асосий жанговар танки бўлган Challenger 2 жуда ҳаракатчан ва аввало бевосита ўт очиш зоналарида фойдаланиш учун мўлжалланган. Танкларни ишлаб чиқарувчи Rheinmetall BAE Systems Land маълумотларига кўра, улар кенг миқёсдаги юқори интенсив тўқнашувларда ҳам ҳаракатлана олади. У 120 миллиметрли L30 сойли танк замбараги билан жиҳозланган. Ушбу турдаги танклар Британия армияси томонидан Босния, Косово ва Ироқда ишлатилган.

Британия ҳукумати Киега 14 та танк етказиб бермоқчилиги ҳақида эълон қилди, агар бу амалга ошса, 1990 йилларнинг охирида яратилган ушбу танклар Украина ихтиёридаги биринчи замонавий Ғарб танкларига айланади.

Дания Франциянинг Nextэр компаниясига ўз армияси учун буюртма берган 19 та Caesar  ўзиюрар артиллерия қурилмаларини Украинага топширишга қарор қилди. Дания ҳозиргача нечта қурилмани олгани ва Украина армиясига қачон етказиб бериши ҳақида маълумот берилмаган, аммо бу Дания армиясида янги бригада яратишни секинлаштириши аниқ.

Ишлаб чиқарувчи компаниянинг маълумотларига кўра, 155 мм калибрли Caesar 2009 йилдан бери дунёнинг кўплаб армияларида фаол ишлатилган ҳамда Афғонистон, Ливан ва Малида ўз кучини исботлаган.

Украинада ҳам аввалроқ Франциядан олинган Caesar’лар фаол ишлатилмоқда.

Қўшма Штатлар Украинага Bradley пиёдалар учун мўлжалланган жанговар машиналарини етказиб беришни ваъда қилди. Бу Америка армиясидаги асосий машина. Иккинчи жаҳон уруши қўмондони Омар Бредли номи билан аталган Bradley 25 миллиметрли замбарак, пулемёт ва танкка қарши ракета тизими билан жиҳозланган.

НАТО давлатлари ваъда қилган бошқа қуроллар қаторида Болтиқбўйи ва Шарқий Европа давлатлари Украинага совет қуролларининг сўнгги захираларини, жумладан гаубицалар, Ми-8 вертолётлари ва Т-72 танкларини юборишга келишиб олди. Шунингдек, ҳарбий ёрдам пакетларидан уруш зонасида ишлатилаётган артиллерия қурилмалари ва ҳаво мудофаа тизимлари учун снарядлар жой олган.

Германиянинг Леопард танклари билан қуролланган бир қатор Европа Иттифоқи давлатлари, жумладан Польша ва Финляндия уларни Киевга беришга тайёрлигини билдирган. Бироқ бунинг учун Берлиндан рухсат талаб қилинади, Германия расмийлари эса танкларни ёлғиз етказиб беришдан бош тортмоқда. Германия канцлери Олаф Шольц Украинадаги можарони Россия ва НАТО ўртасидаги урушга айлантириш нияти йўқлигини айтган. 19 январь куни Süddeutsche Zeitung ва The Wall Street Journal нашрлари юқори мартабали немис расмийларига таянган ҳолда, Шольц АҚШ президенти Жо Байден билан суҳбатда Вашингтон Abrams танкларини Киевга топширсагина, Германия ҳам Украинага Leopard 2 танкларини етказиб беришини айтгани ҳақида хабар берди. Кейинроқ расмий Берлин бундай мулоқот бўлганини рад этди. Шу билан бирга, Пентагон техник хизмат кўрсатишнинг мураккаблигини таъкидлаб, Abrams’ларни етказиб беришнинг имкони йўқлигини билдирган.