АҚШ Мудофаа вазирлиги Эрон “тахминан 12 кун ичида” ядровий бомба ишлаб чиқариши мумкинлигини маълум қилди. Бу ҳақда Reuters хабар берди.
Вазирликнинг сиёсат бўйича ўринбосари Колин Кал буни Байден маъмуриятининг Қўшма кенг қамровли ҳаракатлар режасини (JCPOA) тиклашга интилишининг асосий сабаби сифатида кўрсатди.
“Чунки JCPOA’дан чиққанимиздан бери Эрон ядровий тараққиётга эришди. 2018 йил аввалги маъмурият JCPOA’дан чиқишга қарор қилганида, Эронга битта бомбага керакли материал ишлаб чиқариш учун тахминан 12 ой керак бўларди. Ҳозир эса бу тахминан 12 кунни ташкил қилади”, — деди Кал.
Шунингдек, у дипломатия йўли билан Эроннинг ядровий дастурига қўйилган чекловларни қайта тиклашга умид билдирди.
“Агар бу масалани дипломатия йўли билан ҳал қилиб, уларнинг ядровий дастури бўйича чекловларни қайтарсак, бу бошқа вариантлардан кўра яхшироқ бўларди. Лекин ҳозирда JCPOA музлатилган ҳолатдадир”, — деди вазир ўринбосари.
19 февраль куни Эронда халқаро кузатувчилар мамлакат ядровий қурол яратиш учун зарур бўлган даражадан бир оз паст даражада бойитганини аниқлади. Энди МАГАТЭ ходимлари эронлик мутахассислар 84 фоиз софликдаги бойитилган уранни қандай қилиб тўплашга муваффақ бўлганини аниқлашга ҳаракат қилмоқда. Бу ядровий қуролни яратиш учун зарур бўлган даражадан 6 фоиз паст. Ўз навбатида, Эрон Атом энергияси ташкилоти уранни бойитиш даражаси 84 фоизга етказилганини рад этди.
27 февраль куни АҚШ Марказий разведка бошқармаси директори Уилям Бернс Украинадаги уруш учун қурол бериш эвазига Москва Эронга ракета дастурини ишлаб чиқишда ёрдам бераётганини билдирди.
Ядровий келишув 2015 йилда Эрон ва БМТ Хавфсизлик кенгашининг доимий аъзолари (АҚШ, Россия, Хитой, Буюк Британия ва Франция), шунингдек, Германия ўртасида имзоланган. Келишувлар Теҳронга уранни 3,67 фоизгача бойитиш ва максимал 300 кг уран ишлаб чиқариш имконини беради. АҚШ бир томонлама равишда ядровий битимдан чиққанидан сўнг, Эрон ядровий келишув бўйича ўз мажбуриятларини тўхтатди.
Изоҳ (0)