Пентагон томонидан эълон қилинган ҳисоботда айтилишича, Хитой ўзининг ядровий салоҳиятини ошириб, Россия билан алоқаларни мустаҳкамлаган. Бу ҳақда Military сайти хабар берди.
Хитой ҳарбий қудратига баҳо бериладиган мазкур ҳужжат қонунчилар талаби билан ҳар йили Конгрессга топширилади. Унга кўра, 2023 йил май ҳолатига мамлакатда 600 дан ортиқ ядровий каллак бўлган. 2030 йилга бориб бу кўрсаткич 1000 дан ошиши кутилмоқда.
Бироқ ҳисоботда Хитой қуролли кучларининг юқори органларида авж олган корруспия даъволари Пекиннинг режаларига салбий таъсир ўтказиб, модернизация кампаниясини секинлаштириши мумкинлиги алоҳида қайд этилади. Сўнгги вақтларда мазкур айблов билан камида 15 нафар юқори мартабали амалдор лавозимидан четлатилган.
“Коррупция тўлқини Хитой қуролли кучларининг барча бўлимларига таъсир қилади. Бу сиёсатчиларнинг ҳарбийларга ишончига путур етказган бўлиши мумкин”, дейилади ҳужжатда.
2024 йилнинг июнь ойида Хитой собиқ мудофаа вазири Ли Шанфу ва ундан олдинги вазир Вей Фенхе ҳукмрон Коммунистик партия сафидан чиқариб юборилганди. Бунга коррупция айблови сабаб бўлиши мумкин. Ноябрь ойига келиб, амалдаги мудофаа вазири Донг Жун ҳам терговга тортилгани маълум қилинди.
Шунга қарамай, Пекин айрим ютуқларни қўлга киритди. Исмини ошкор қилмаслик шарти билан Military сайтига интервью берган хитойлик расмийнинг огоҳлантиришича, Хитой янада хилма-хил ва мураккаб ядровий қуролларни ривожлантириш устида иш олиб боряпти. Ядровий каллаклар сонини изчиллик билан ошириш билан бир қаторда, уларнинг технологик имкониятлари ҳам кенгайтирилмоқда.
Бироқ мудофаа соҳасидаги юқори мартабали амалдорнинг таъкидлашича, Хитой ҳарбий салоҳиятидаги ўзгариш тенденциясини турлича баҳолаш мумкин. Чунки баъзи дастурларда тараққиётга эришилган, бошқаларида орқага қайтиш кузатилган.
Ҳисоботда Хитойнинг учувчисиз учиш тизимлари соҳасидаги ютуқларига ҳам эътибор қаратилган. Ҳужжатга кўра, Хитой “АҚШ стандартларига яқинлашиб келмоқда”.
АҚШ расмийлари Пекининг Москва билан алоқалари мустаҳкамланганини Хитой Россияга икки хил мақсадга мўлжалланган маҳсулотлар сотгани билан изоҳлаган. Уларни фуқаролик ва ҳарбий эҳтиёжларда қўллаш мумкин.
“Пентагоннинг миллий мудофаа стратегияси Хитой атрофида қурилган. Боиси мамлакат АҚШ учун энг йирик потенциал хавф ҳисобланади. Икки ўртада Тайван ҳамда Филиппин борасида келишмовчиликлар бор. Шунга қарамай, мандати якунланиб бораётган президент Байден Пекин билан мувозанатли сиёсат юртишга ҳаракат қилиб келгани эътирофга лойиқ” дейилади Military сайтидаги мақолада.
Изоҳ (0)