Пентагоннинг қаршилигига қарамай, Байден Россиянинг Украинадаги жиноятлари ҳақидаги далилларни ХЖСга беришни буюрди — NYT

АҚШ президенти Жо Байден ўз маъмуриятига Россиянинг Украинадаги уруш жиноятлари тўғрисидаги далилларни Гаагадаги Халқаро жиноий суд (ХЖС) билан бўлишишни буюрди. Бу ҳақда The New York Times манбаларга таяниб хабар бермоқда.

Журналистларга маълум бўлишича, Пентагон бир неча ой давомида далилларнинг ХЖСга ўтказилишига қаршилик қилганига қарамай, Байден ўтган куни шундай қарорга келган. NYT таъкидлаганидек, ҳарбийлар бундай ҳамкорлик кейинги суд жараёнларига асос бўлиши, келажакда ХЖС америкаликларни жиноий жавобгарликка тортиши мумкинлигидан қўрқмоқда.

Байден далилларни Гаагага топшириш борасида нега бунчалик узоқ ўйлангани ва охир-оқибат ҳужжатларни топширишга уни нима ундагани номаълум, дейди газета манбаси.

АҚШ президенти маъмурияти ўз сиёсатидаги ўзгаришлар, шунингдек, Вашингтон Гаага билан айнан қандай ҳамкорлик олиб бориши ҳақида ҳали расман эълон қилгани йўқ. Бироқ 25 июль куни Оқ уй бу ҳақда Конгресс аъзоларини хабардор қилди, деди NYT манбалари.

Америка разведкасининг Гаагани қизиқтириши мумкин бўлган маълумотлари орасида Россия расмийлари Украинанинг фуқаролик инфратузилмасига зарба бериш ва минглаб украиналик болаларни оккупация қилинган ҳудудлардан олиб кетиш тўғрисида қарор қабул қилгани ҳақидаги маълумотлар бор, деб эслатди NYT мухбири. АҚШ бу маълумотларнинг бир қисмини аллақачон Украина прокуратураси билан баҳам кўрган, бироқ ҳозиргача Гаага билан ҳамкорлик қилишдан ўзини тийиб келган.

• ХЖС юрисдикцияси Рим статутини ратификация қилган мамлакатлар ҳудудида содир этилган жиноятларга ёки ушбу мамлакатлар фуқаролари томонидан дунёнинг исталган нуқтасида содир этилган жиноятларга тааллуқлидир. Айни пайтда статут дунёнинг 120 дан ортиқ давлати томонидан ратификация қилинган. АҚШ ва Россияда статут амал қилмайди.
• 17 март куни Гаагадаги Халқаро жиноий суд Россия президенти Владимир Путинни ҳибсга олишга ордер берди. У Украинанинг босиб олинган ҳудудларидан болаларни Россияга ноқонуний депортация қилишда гумон қилинмоқда. Худди шундай ордер Россия болалар омбудсмани Мария Лвова-Беловага нисбатан ҳам чиқарилган.