АҚШга Украина ҳисобига сарфланган қурол захираларини тўлдириш учун 15 йил керак — WP

Дунёдаги энг йирик ҳарбий бюджет (йилига 800 миллиард доллардан ортиқ) ва ривожланган саноатга қарамай, Вашингтоннинг ҳарбий захиралари Украинадаги уруш сабаб тугади, уни тиклаш учун ўнлаб йил керак бўлиши мумкин, деб ёзмоқда The Washington Post.

Нашр билан суҳбатлашган таҳлилчиларнинг фикрича, Пентагон Америка омборларидан чиқарилган ва Украинага олиб келинган қурол-яроғ захираларини тўлдириш учун етарлича ҳаракат қилмаяпти. WP маълумотларига кўра, АҚШ Қуролли кучлари қўмондонлиги вакиллари мамлакат ҳарбий-саноат комплексининг “мўртлиги”га очиқ ишора қилмоқда, ҳозирги қурол ва ўқ-дорилар ишлаб чиқариш ҳажми асосий захиралар тугашининг олдини олиш учун етарли бўлмаслиги мумкин. 

Ишлаб чиқариш даражасининг пастлиги АҚШдан дейлик, бошқариладиган ракеталар, самолётлар ва жанговар дронлар каби асосий қурол тизимлари захирасини тўлдириш учун тинчлик давридаги даражада 15 йил, уруш давридагида эса саккиз йилдан кўпроқ вақт талаб этади.

WP уруш давом этаётган бир йилда Американинг Украинага ҳарбий ёрдами рекорд даражада 30 миллиард долларга етгани ва қуролларнинг катта қисми Пентагон захираларидан олинганини эслатди.

“Айни пайтда, Украинага қурол етказиб беришни ҳисобга олмаганда ҳам, АҚШнинг кўплаб қурол тизимлари узоқ вақтдан бери алмаштиришга муҳтож”, — деб ёзади газета. Маълумотларга кўра, жорий ишлаб чиқариш даражаси АҚШнинг UH-60 Black Hawk вертолётлари паркини алмаштириш учун 10 йилдан кўпроқ вақтни ва замонавий ўрта масофага мўлжалланган “ҳаво-ҳаво” ракеталарини алмаштириш учун қарийб 20 йилни олади. Шу билан бирга, Пентагонга авиаташувчилар паркини алмаштириш учун камида 44 йил керак бўлади.

Нашрнинг тушунтиришича, Иккинчи жаҳон урушидан кейин, ўнлаб йиллар давомида ҳарбий харажатлар қисқарган, ҳарбий-саноат мажмуаси кескин камайган. Хусусан, 1990 йилларда ушбу секторда 51 та йирик компания бўлган бўлса, ҳозирги кунда бешга яқин шундай компаниялар қолган.

Россиянинг Украинадаги босқини бошланганидан сўнг, Қўшма Штатлар ҳамда Ғарб иттифоқчилари Москвага қарши санкциялар киритди ва ҳарбий ёрдамни оширди. АҚШ президенти Жо Байден Украинага “қанча керак бўлса, шунча” ёрдам кўрсатишга ваъда берди.