АҚШнинг амалдаги президенти Жо Байден мудофаа бюджети тўғрисидаги қонунни имзолади. Қайд этилишича, ушбу қонун ўз биологик жинсини ўзгартиришни хоҳлаган ҳарбий хизматчиларнинг фарзандлари даволаниш харажатларини қоплашни тақиқлайди.
Оқ уй раҳбари мазкур қоидага шахсан қарши чиқди, чунки унинг таъкидлашича, мазкур қоида гендер ўзига хослигига кўра муайян одамлар гуруҳига қарши қаратилган. Байден “қонун лойиҳаси ота-оналарнинг ўз фарзандлари учун энг яхши ғамхўрликни белгилаш борасидаги вазифасига аралашади” деб ҳисоблайди, деб ёзади Associated Press.
Байденнинг таъкидлашича, “минглаб ҳарбий хизматчиларнинг фарзандларини тиббий суғурталашни рад этувчи ушбу қоида АҚШ Мудофаа вазирлигининг ҳарбийларни ўз сафида сақлаб қолиш имкониятига путур етказади”.
“Ҳеч бир ҳарбий хизматчи ўз оиласи учун тиббий хизматдан фойдаланиш ва ватанга хизмат қилиш ўртасида танлов қилишга мажбур бўлмаслиги керак”, деди сиёсатчи.
Ҳужжатнинг дастлабки версиясига республикачи Майк Жонсоннинг талаби билан 18 ёшгача бўлган шахсларни “бепуштликка олиб келиши мумкин бўлган” жинсий дисфорияни даволашни тақиқловчи қоида киритилган. АҚШ Вакиллар палатасида бу тадбир демократларнинг кескин норозилигига сабаб бўлди, бироқ Сенатда қонун лойиҳаси кўпчилик овоз билан (85 га қарши 14) қабул қилинган.
Пентагоннинг 2025 йил учун харажатларини белгилайдиган янги қонун, шунингдек, кичик сержантларнинг маошини 14,5 фоизга оширишни; Хитойнинг ўсиб бораётган қудратига қарши курашиш чораларини, хусусан, Тайванни ҳарбий жиҳатдан қўллаб-қувватлаш жамғармасини ташкил этишни; АҚШ Мудофаа вазирлигининг режалаштирилган йиллик ҳарбий харажатларини 895 миллиард долларга етказишни (жорий йилдагидан 1 фоиз кўп) назарда тутади.
Изоҳ (0)