Hayotdagi ayrim vaziyatlarda inson o‘zini yolg‘iz his etadi. Turmushdagi qandaydir muammolar, mavsumiy tushkun kayfiyat yoki yaqin insonlar bilan kelishmovchiliklar bunga sabab bo‘lishi mumkin. Mana shunday daqiqalarda ichki energiyangizni qayta to‘ldirishga qodir bo‘lgan ilhombaxsh film va seriallar sizga yordamga keladi.
“Uning uch qizi” (2023)
Syujet markazida Keti, Reychel va Kristina ismli opa-singillar turadi, ular saraton kasalligidan vafot etayotgan otasini qo‘llab-quvvatlash uchun ota uylariga qaytishga majbur bo‘ladi. Alohida o‘tkazgan uzoq yillar davomida qizlar bir-birlari bilan aloqani uzgan bo‘ladi. Uy-joy va meros masalasi ko‘tarilganda oiladagi vaziyat yanada og‘irlashadi.
Ushbu oilaviy dramada o‘z vaqtida aytilmagan so‘zlar, yechilmay qolgan muammolar eng yaqin insonlaringizni yo‘qotishingizga sabab bo‘lishi mumkinligi ko‘rsatadi.
“Hayotda yashamoq” (2023-2024)
Marketolog Anna Boginskayaning turmush o‘rtog‘i avtohalokatda vafot etgach, tushkunlikka tushadi. Ma’lum vaqtdan so‘ng jarroh Matvey bilan uchrashuv unga yangi sevgiga umid baxsh etadi, lekin tez orada u yigitning xatti-harakatlarida nomaqbulliklarni seza boshlaydi. Anna yigitni tekshirgach, ma’lum darajada mazhabni eslatuvchi pikaper yigitlar klubining qurboni bo‘lganini bilib qoladi.
Serial bosh qahramoni kabi hayot o‘z yo‘lini yo‘qotib qo‘yganlar uchun mos keladi. Ikkinchi faslda Anna butunlay yangi qiyofadagi ayolga — o‘z huquqlarini himoya qila oladigan va ozor beruvchi gaplarga qat’iy javob qaytarishga qodir insonga aylanadi.
“Mening pingvin do‘stim” (2024)
Filmdagi asosiy qahramon hayotida katta fojiani boshdan kechirayotgan paytda tasodifan adashib qolgan pingvinni topib oladi. Baliqchi yangi do‘stni parvarish qilish vaqtida unga bog‘lanib qoladi. Jajji pingvin undagi bir vaqtlar unutilgan tuyg‘ularni qayta uyg‘otadi va qahramon hayotning quvonchlarini qayta kashf qila boshlaydi.
“Amanda” (2022)
24 yoshli Amanda qanday qilib do‘st tutinishni bilmagani uchun kunlarini yolg‘izlikda o‘tkazadi. Har shanba kuni u uyi yaqinidagi kafega — diskotekaga boradi, lekin hech kim bilan gaplashishga jur’at etmaydi. Uning onasi Amandani qo‘shni qiz Rebekka bilan do‘stlashishga undaydi, natijada Amanda oz bo‘lsa-da ijtimoiylashishga harakat qiladi. Mazkur italyan dramasi qarama-qarshiliklarning bir-birini doim o‘ziga tortishi haqidagi eski mavzuni ko‘taradi. Kattalar dunyosida o‘zini topa olmagan ikki qiz o‘rtasidagi muloqot ularga insonlardan uzoqda bo‘lish odatidan qutulishga yordam beradi.
“Yashash uchun 257 sabab” (2020)
Jenya Korotkova hayotidagi eng katta g’alabani qo‘lga kiritadi — u saraton kasalligini yengadi. Ammo uch yillik kurashish davomida Jenya ko‘p narsalarni yo‘qotadi: endilikda sog‘aygan qiz hech kimda hamdardlik uyg‘otmaydi, uning qallig‘i rahmi kelgani uchungina Jenyani tashlab ketmagan bo‘ladi, singlisi esa davolanish uchun yig‘ilgan pulni o‘zlashtirib oladi. Hatto uning dugonalari ham avval kasal bo‘lgan qizdan jirkana boshlaydi. Shunday kunlarning birida Jenya o‘zining eski kundaligini topib oladi, unda yashash uchun 256 ta sabab ro‘yxati tuzilgan bo‘ladi. Qahramon unga 257-raqamli sababni — “haqiqiy sevgini topish”ni qo‘shadi va hayotini qaytadan quradi.
“Substansiya” (2024)
Demi Mur ijrosidagi Elizabet Sparkl aerobika mashg‘ulotlari haqidagi teleko‘rsatuv olib boruvchisi bo‘ladi. U 50 yoshga to‘lganda, prodyuser uning o‘rniga qandaydir yosh yulduzni ko‘rishni istab, Elizabetni ishdan bo‘shatadi. Aynan shu paytda Elizabetning qo‘liga “Substansiya” nomli preparat tushib qoladi. Bu dori uning yoshroq, go‘zalroq va mukammalroq yangi versiyasini yaratishni va’da qiladi. Ammo haftadan bir marta u o‘z holatiga — qari ayol tanasiga qaytishi kerak bo‘ladi. Ammo kelib chiqishi noma’lum bo‘lgan vositani iste’mol qilish turli ko‘ngilsiz voqealarga sabab bo‘ladi.
“Ideal kunlar” (2023)
Mazkur Yaponiya dramasi 2023-yilda yilning eng yaxshi xorijiy film uchun “Oskar” nominatsiyasini olgan. Unda farrosh bo‘lib ishlaydigan Xiroyama ismli o‘rta yoshli erkak haqida hikoya qilinadi. Uning kundalik hayoti “Sug‘ur kuni”ga o‘xshaydi — muntazam ravishda takrorlanadi.
Uning bog‘dorchilik, audiokasseta tinglash va kitob o‘qish kabi sevimli mashg‘ulotlari bor, lekin bir necha uchrashuvdan keyin hammasi o‘zgaradi. Endi u odatdagi komfort zonasidan haqiqatan ham qoniqadimi yoki yo‘qmi, o‘ylay boshlaydi.
“Ko‘chmanchilar o‘lkasi” (2021)
Frensis Makdormand rolini o‘ynagan bosh qahramon erining o‘limidek katta judolikni boshidan kechiradi. 60 yoshida ishidan ayrilgach, u qadrdon shahrini tark etib, furgonda yashab, ko‘chmanchi hayot kechirib, Amerika bo‘ylab sayohat qilishga qaror qiladi.
Film Amerikaning odatiy qiyofasini emas, balki bir shtatdan ikkinchi shtatga ko‘chib yurib, mehnat qiluvchi oddiy aholining hayotini yoritadi. Filmda amerikalik odamlar umrini cheksiz harakatda o‘tkazadigan oddiy mehnatkashlar nigohi bilan ko‘rsatiladi.
“Hammasi har joyda va birdaniga” (2022)
Evelin Vong Amerika kir yuvish markazini ochadi, ammo uning biznesi yaxshi daromad keltirmaydi. Bir vaqtning o‘zida ayolning soliq to‘lovlari bilan muammo yuzaga keladi, farzandining tarbiyasida keskin o‘zgarishlar sodir bo‘ladi hamda otasi bilan munosabatlarida qiyinchiliklarga duch keladi. Buning ustiga, Evelin turmush o‘rtog‘idan ajrashadi. Bir vaqtda boshiga turli xil ofatlar kelgan Evelin to‘satdan o‘zida noodatiy kuchni kashf etadi va hayotini ijobiy tomonga o‘zgartirishga bel bog‘laydi.
“CODA: Eshitmaydigan ota-onaning farzandi” (2020)
Qulog‘i eshitmaydiganlar oilasi Amerikaning chekka qishlog‘ida yashaydi. Ular baliq ovi bilan kun kechiradi. Oiladagi kenja qiz Rubi ular orasidagi yagona eshituvchi odam bo‘lib, oilasi va tashqi dunyo o‘rtasida bog‘lovchi inson vazifasini bajaradi. Qiz xor guruhiga qo‘shilib, qo‘shiq kuylashni yoqtirib qolganida uning hayoti keskin o‘zgaradi. Natijada qiz oldida ikki murakkab tanlov turadi: oilaga doimgidek yordam berish yoki musiqa karyerasini tanlash.
2022-yilgi “Oskar” taqdirlash marosimining eng yaxshi filmi deb topilgan. Bundan tashqai, kartina Gotham Awards, BAFTA, Critics’ Choice va boshqa bir qator mukofotlarni qo‘lga kiritgan.
“Uch ming yillik tilak” (2022)
Aleteya ismli tilshunos mutaxassis o‘zining yangi ma’ruzalar kursi bilan Istanbulga uchib keladi. Esdalik sovg‘alari sotiladigan do‘konlardan birida u ichida jin yashaydigan qadimiy shisha butilkani xarid qiladi. Jin ozodlikka erishish uchun Aleteyaning uchta istaklarini bajarishga tayyor turadi, ammo dono qiz tilaklarni behuda sarflamaslikka va buning o‘rniga jin qanday qilib bunday holatga kelib qolganini bilishga harakat qiladi. Shunday tariqa jin hayoti haqidagi hikoyani boshlaydi.
“Rassom va o‘g‘ri” (2020)
Chexiyalik rassom Barbora Kisilkova Oslodagi ko‘rgazmada o‘zining ikkita ajoyib asar — “Oqqushlar qo‘shig‘i” hamda “Xloya va Emma” asarlarini namoyish qiladi. Tez orada ikkala rasm o‘g‘irlanadi, ammo jinoyatchilar qisqa vaqtda qo‘lga olinadi. Barbora jinoyatchilardan biri bilan uchrashadi va uning suratini chizishga qaror qiladi. Suhbat davomida rassom ham, o‘g‘ri ham kutilmagan qirralari ochiladi va ular o‘rtasida hissiy aloqa hosil bo‘ladi.
Izoh (0)