Кузнинг илиқ ва қулай муҳитига ошно қиладиган мультфильмлар рўйхатини тўпладик – кузги кайфиятга шўнғишни истаган пайтингиз томоша қилиш ёқимли бўлади.
“Эрнест ва Селестина: янги саргузаштлар”
Эрнест ва Селестина шунчаки дўст эмас, чунки уларнинг бири айиқ, иккинчиси сичқон. Бир сафар улар Эрнестнинг дунёнинг энг иқтидорли мусиқачилари яшайдиган она шаҳрига боришади. Аммо етиб боргач, дўстлар у ерда мусиқа кўп йиллар давомида тақиқланганлигини билишади. Улар янги дўстлари ва сирли ниқобли жиноятчи билан биргаликда айиқлар мамлакатига қувонч келтиришга қарор қилишади.
“Кичкина Николя”
Парижда икки нафар тиниб-тинчимаган одам яшаган — ёзувчи ва рассом, улар ўз саргузаштлари билан кулранг кундалик ҳаётни ранг-баранг қила оладиган қаҳрамонни ўйлаб топган. Николя шундай пайдо бўлади — ота-онасини яхши кўрадиган, мактабга борадиган, дўстлари билан мулоқот қиладиган ва учувчи бўлишни орзу қиладиган шумтака бола. Унинг асосий фазилати — ҳатто энг оддий нарсаларда ҳам ўйин-кулги ва завқлана олиш қобилиятидир.
“Уддабурон жаноб Фокс”
Мультфильмда айёр тулки ҳақида ҳикоя қилинади, у хотинининг ҳомиладорлигини билиб, жиноий фаолиятини тўхтатишга ваъда беради. Аммо барибир у хавфли вазиятларга олиб келадиган саргузаштларга аралашиб юраверади.
Машҳур Уэс Андерсон нафақат “Тўлин ой қироллиги” ва “Гранд Будапешт меҳмонхонаси” услубидаги эски мактаб трагикомедияларини суратга олишни билади — у стоп-моушн қўғирчоқ анимациясида ҳам маҳоратини намойиш қилади. “Уддабурон жаноб Фокс” фильмида Андерсон фильмларининг барча энг яхши хусусиятларини сақлаб қолади: драма ва ҳазил уйғунлиги, замонавий картина, қизиқарли ҳикоя. Анимация унга тасаввур учун қўшимча имкониятлар беради.
Ҳамма ҳаракатни тезроқ ва силлиқроқ кўрсатишга ҳаракат қилаётган бир пайтда, унинг қаҳрамонлари шунчаки ўз жойларида қотиб қолишлари ва бир-бирига қарашлари мумкин.
“Бўрилар афсонаси”
Ушбу мультфильм режиссёри Томм Мур – замонавий мультфильмлар дунёсининг етакчиларидан бири. У ўз ишларида одатда Ирландия фолклори ва тарихига мурожаат қилади. “Бўрилар афсонаси”да воқеалар 1650 йилда Ирландиянинг Килкенни шаҳарчасида бўлиб ўтади. Асосий қаҳрамон Робин – овчининг қизи бўлиб, у отаси билан бирга Англиядан Килкеннига кўчиб келади. Отаси Робинни ҳимоя қилиш мақсадида унга уйидан чиқишни тақиқлайди, чунки шаҳар атрофларида бўрилар бор. Аммо бу оддий бўрилар эмас, афсоналарга кўра, одам-қиёфасига кирадиган жонзотлар. Бироқ Робин қўл қовуштириб ўтирадиган қизлардан эмас. У ҳам ўқ-ёйдан яхши фойдаланади. Шунинг учун имкон туғилиши биланоқ у яширинча ўрмонга қочиб кетади.
“Ҳилда”
Мулцериал британиялик рассом Люк Пирсоннинг комиксларига асосланиб суратга олинган. Пирсон “Ҳилда” ҳақидаги ҳикояларни яратишда Скандинавия мифологиясидан илҳомланган. Мулцериал сюжетига кўра, қизиқувчан ва фаоллиги билан ажралиб турадиган Ҳилда онаси ва уй жонивори — Твиг билан ўрмонда яшайди. У кун бўйи атрофни ўрганиб, турли хил сеҳрли мавжудотлар билан мулоқот қилади: элфлар, гигантлар ва Полено исмли ғаройиб махлуқ. Бир куни онаси унга оддий болаликни таъминлаш учун Ҳилдани яқин атрофдаги Троллберг шаҳрига кўчиришга қарор қилади. Аввалига Ҳилда онасининг бу фикрига қарши бўлса-да, охир-оқибат бу қарорни қабул қилади. Ахир унинг ҳаётидан сеҳр ва саргузаштлар барибир ҳеч қаерга йўқолмайди.
“Кваб ва Жаб”
Ёқимли, кулгили ва баъзан ғалати ҳикоялар икки энг яхши дўст – Квак ва Жабб лақабли бақалар ҳаётидан олинган. Улар бир-бирига бутунлай зид: Квак фаол ва саргузаштларни яхши кўради, Жабб эса ҳақиқий уйқучи. Аммо улар бир-бирини ажойиб тарзда тўлдиради ва доим бирга вақт ўтказади, ўрмоннинг бошқа аҳолисини ҳам ўз саргузаштларига тортиб кетади. Буларнинг барчаси ҳаёт ва дўстлик ҳақида фалсафий суҳбатлар билан бойитилган.
Изоҳ (0)