“Ёввойи робот” фильми тасодифан ёввойи оролга тушиб қолган Роз исмли робот ҳақида ҳикоя қилади. Ушбу ажойиб ва таъсирли ҳикоя кўплаб томошабинларни ўзига жалб этди. Унда робот тимсолида инсонийлик туйғусини сақлаш қанчалик муҳим эканлиги акс этган. Аммо бундай руҳдаги анимацион фильмлар аввал ҳам кўп суратга олинган.
Қуйида замонавий технология ва атрофдаги олам ўртасидаги уйғунлик, ўзаро тушуниш ва эзгулик мавзулари ёритиладиган ва сизни ўйлашга мажбур қиладиган бешта энг яхши анимацион фильмларни тақдим этамиз.
“Темир гигант” (1999)
Американинг сокин провинцияси аҳолиси кўзни қамаштирувчи чақнаш ва улкан учувчи жисмнинг қулашига гувоҳи бўлади. Бир неча кундан кейин Ҳогарт Хьюз исмли бола узоқ галактикадан Ерга учиб келган улкан роботни учратади ва унга ҳарбий хизматдан қочишга ёрдам беради. Маҳаллий аҳоли роботни ер юзи учун таҳдид деб билади, аммо аста-секин робот вайронкор эмас, балки ҳимоячи бўлишни ўрганади.
“Ёввойи робот” ҳам, “Темир гигант” ҳам технология қандай қилиб инсоният дунёсининг бир қисмига айланиши мумкинлигини ёритади. Роз ва Гигант иккиси машина ҳолатидан танлаш қобилиятига эга мавжудот даражасига кўтарилади.
“Валл-I” (2008)
Мазкур анимацион фильмда инсоният Ерни тарк этади ва космосга учади. Кичкина Валл-I эса сайёрани ахлатдан тозалайдиган ягона роботга айланади. Бироқ робот уни келажакда қандай воқеалар кутаётганини билмайди. Мультфильм давомида Валл-I янги дўстлар билан учрашади, космосга учади ва ҳаттоки “Аксиома” лайнери орқали Ерни тарк этган инсонларни ортга қайтаради.
“Ёввойи робот” ва “Валл-I” замонавий технология, табиат ва экология мавзуларини бирлаштиради. Иккала қаҳрамон дунёга яхшилик олиб келиш ва инсонпарвар бўлишни ўрганади.
“Кубо. Самурай афсонаси” (2016)
Кубо — буюк тарихга эга оиланинг меросхўри бўлади, лекин ўтмишдаги руҳлар қасос олиш учун қайтиб келганида уни фақатгина бир жуфт қўриқчи — қайта тирилган маймун ва қўнғиз самурайлари ҳимоя қилишга журъат этади.
Роз сингари, Кубо ҳам ўзлигини ва атрофидаги дунёни ўрганиб, мураккаб йўлларга тўла қизиқарли саёҳатни бошдан кечиради. Иккала қаҳрамон ҳам илгари бегона деб ҳисоблаганлар орасидан дўст топади ва ёвузлик билан курашда табиатга таяниш кераклигини ўрганади.
“Қаҳрамонлар шаҳри” (2014)
Даҳо ихтирочи Ҳиро Ҳамада укасини йўқотади, лекин тез орада ажойиб тиббиёт роботи — паҳмоқ Беймакс билан дўст тутинади. Улар биргаликда ёвуз кучни мағлуб этиш учун қаҳрамонлар жамоасини йиғади.
“Ёввойи робот” ва “Қаҳрамонлар шаҳри” анимацион фильмларида йўқотиш, дўстлик ва қийин дамларда бир-бирини қўллаб-қувватлаш каби мавзулар кўтарилади. Беймакс ҳам худди Роз каби оддий машина бўлишни ўрганади.
“Келлс сири” (2009)
12 ёшли Брендан Ирландиядаги амакиси бошқарадиган Келлс аббатлигида яшайди. Роҳиблар ўзларини викинглар босқинидан ҳимоя қилиш учун кўп вақтларини баланд девор қуришга сарфлайдилар. Аммо бир куни талон-торож қилинган монастирдан қочган Айдан уларнинг олдига келади ва ниҳоятда чиройли китоб олиб келади. Китобни иллюстрациялар билан тўлдириш Бренданнинг зиммасига тушади.
Иккала мультфильмда табиат ва маданият ўртасидаги боғлиқликлар ўрганилади. Роз сингари Брендан ҳам санъат ва табиатни бирлаштирадиган янги дунёни кашф этади.
Изоҳ (0)