Ўзбекистонда 2025 йил 1 январдан ногиронлиги бўлган ишчилар учун ижтимоий солиқ 1 фоиз этиб белгиланади. Бу ҳақда президент иштирокидаги йиғилишда маълум қилинди.
Президент матбуот хизмати хабарига кўра, жорий йилда тадбиркорлар 40 минг ногиронлиги борларни ишга олган.
“Буни янада кенгайтириш мақсадида 1 январдан ногиронлиги бўлган ишчилар учун ижтимоий солиқ 1 фоиз этиб белгиланади. Корхоналарга сурдотаржимон, психолог ва кўзи ожизлар учун ҳамроҳлик хизмати харажати учун 50 миллион сўмгача субсидия ажратилади”, дейилади манба хабарида.
Шу билан бирга, мажлисда ногиронлиги борларга бериладиган протез ва реабилитация воситалари рўйхати 18 тадан 30 тага, маблағи эса 1,5 баробарга оширилгани айтилган. Бунинг эвазига йил бошидан 100 минг одамни эҳтиёжи таъминланган. Энди рўйхатга яна 7 турдаги воситалар қўшилиши белгиланмоқда.
Йиғилишда Ижтимоий хизмат агентлигига вилоят ҳокимлари билан биргаликда 2025 йилда 80 минг муҳтож одамга зарур протез воситаларини етказиб бериш топширилди.
“Солиқ кодекси”да ёзилишича, ижтимоий солиқ тадбиркорлик субъектлари, хорижий юридик шахслар ваколатхоналари ҳамда жисмоний шахсларнинг айрим тоифалари маблағларидан ҳар ой ундирилади. Иш берувчининг ходимлар меҳнатига ҳақ тўлашга доир харажатлари ижтимоий солиқнинг солиқ солиш объекти ҳисобланади. Бугунги кунда ижтимоий солиқ ставкаси 12 фоизни ташкил этади. Мазкур солиқ тушумлари пенсиялар учун йўналтирилади.
“Дарё” мухбири Солиқ қўмитаси билан боғланиб, ногиронлиги бўлган шахслар учун имтиёз ҳақида маълумот олди. Қўмитанинг маълум қилишича, бундай шахслар учун ижтимоий солиқ ставкасининг 1 фоизга туширилса, улар учун алоҳида ҳисоб юритилади. Лекин корхонага умумий солиқ ставкаси ўзгармайди. Масалан, корхона ўтган сафар 10 миллион сўм ижтимоий солиқ тўлади. Мазкур солиқ ставкаси ногиронлиги борлар учун пасайтирилса, корхона тўлайдиган ижтимоий солиқ миқдори ногиронлар сонига қараб ўзгаради. Мисол учун, корхонанинг 5 нафар ногирон ходими бўлса, айнан уларга 10 миллион сўмдан чегирма қилинади.
Изоҳ (0)