Испания ҳукумати аҳолининг қариши сабабли мамлакатдаги ишчи кучи танқислигини тўлдириш учун йилига 300 минггача мигрантни қонунийлаштириш ниятида. Бу ҳақда мамлакат ижтимоий таъминот ва миграция вазири Элма Саис Economic Times нашрига маълум қилди.
“Испанияда очиқ, гуллаб-яшнаган мамлакатга айланиш ёки ёпиқ, қашшоқ мамлакат бўлиб қолиш ўртасида танлов бор. Биз биринчисини танладик”, деди у.
Вазирнинг сўзларига кўра, мигрантлар билан боғлиқ сиёсат уч йил давом этади. Унинг аниқлик киритишича, Испания фаровонликни сақлаб қолиш учун йилига солиқ тўлай оладиган 250-300 минг хорижий ишчига муҳтож.
Маълумотларга кўра, ҳокимият томонидан янги чора-тадбирлар мигрантларга яшаш ва ишлаш учун рухсатномалар бериш тартиб-таомилларини соддалаштиришни назарда тутади, бу эса чет эллик ишчи кучига кафолатланган меҳнат ҳуқуқларини олишга ёрдам беради. Бундан ташқари, иш излаётган ташриф буюрувчилар визасини 3 ойдан 12 ойгача узайтириши мумкин. Ўқиш визасига эга хорижликларга ҳафтасига 30 соатгача ишлашга рухсат берилади.
ОАВнинг қайд этишича, 48,9 миллион аҳолига эга Испания иқтисодиёти Европа иттифоқида энг тез ўсаётган мамлакат ҳисобланади. Бу тенденцияга Лотин Америкаси давлатларидан малакали мигрантлар оқими ҳам ёрдам бермоқда. Fitch Ratings Inc агентлигининг ҳисоб-китобларига кўра, 2022 йилда Испанияга олдинги ўн йилликдагидан кўра кўпроқ мигрант келган.
Аввалроқ Европа иттифоқига етиб олишга уринаётган тахминан 200 нафар ноқонуний мигрантни олиб кетаётган кема Сенегал қирғоқларида ағдарилиб кетгани хабар қилинганди.
Шу йилнинг сентябрь ойида Италиянинг Лампедуза ороли яқинида қайиқ ағдарилиб кетиши оқибатида 21 нафар мигрант бедарак йўқолган.
2024 йилнинг етти ярим ойида Ғарбий Африка давлатларидан Канар оролларига 22 мингдан ортиқ ноқонуний мигрант келган бўлса, 2023 йилнинг шу даврида бу кўрсаткич 9,8 минг нафарни ташкил этган.
Изоҳ (0)