Олий Мажлис Қонунчилик палатасининг 26 ноябрь куни ўтказилган йиғилишида депутат, “Миллий тикланиш” демократик партияси фракцияси раҳбари Алишер Қодиров бюджет маблағлари ҳисобига суратга олинаётган кинофильмларнинг кенг намойиш этилмаётганини танқид остига олди.
“Халқимизнинг тафаккури ва дунёқарашини ўзгартириш бўйича кинофильмлар ва болалар анимацион фильмлари яратиш бўйича яхшигина маблағлар ажратиляпти. Буни олқишлаймиз ва қўллаб-қувватлаймиз.
Лекин битта муаммо, бу ишлаб чиқарилаётган фильмларни кинопрокат, яъни кинотеатрлар орқали намойиш қилиняпти. Агар бир йил ичида бу фильмни кўрган одамлар сони ўн мингга боради, ё бормайди. Лекин бюджетдан ажратилаётган бу маблағ халқимизнинг тафаккурини ўзгартириш учун ажратилган. Нима учун миллий телеканаллар орқали бу кенг намойиш қилинмайди? Ёки бюджетдан бу пулни жойига қўйиб қўйиш талаб қилинганми?
Шунинг учун ҳам маданият вазирлигига биз ўзимизнинг таклифларимизни бердик. Бу фильмларни мақсад халқимизнинг тафаккурини ўзгартириш бўладиган бўлса марҳамат қилиб кенг намойишга қўйиш керак”, дейди Алишер Қодиров.
Аввалроқ депутат ўқитувчилар фаолияти самарадорлигини баҳолаш тизимини йўлга қўйиш, мактабда ўқитувчилар ўртасида рақобат тизимини яратиш лозимлигини билдирганди.
Маълумот учун, Олий Мажлис Қонунчилик палатасининг 26 ноябрь куни ўтказилган йиғилишида бир нечта қонун лойиҳалари депутатлар томонидан кўриб чиқилган. Жумладан, “2025 йил учун Ўзбекистон Республикасининг Давлат бюджети тўғрисида”ги қонун лойиҳаси биринчи ўқишда кўриб чиқилган.
Муҳокамаларда фракция раҳбарлари томонидан бюджет даромадларини ошириш, солиқ базасини янада кенгайтириш, яширин иқтисодий фаолиятни қисқартириш, бюджет маблағларидан фойдаланишда самарадорлигини ошириш юзасидан аниқ таклиф ва тавсиялар берилган.
Изоҳ (0)