Ўзбекистонда нодавлат мактабгача ва мактаб ташкилотлари барча турдаги солиқ ва йиғимлардан озод қилинади. Бу ҳақда “Таълим соҳасида хусусий сектор иштирокини ошириш бўйича қўшимча чора-тадбирлар тўғрисида”ги президент қарорида белгиланди.
Қарор билан 2030 йил 1 январгача нодавлат мактабгача ва умумий ўрта таълим ташкилотлари:
- барча турдаги солиқ (бундан ижтимоий солиқ мустасно) ва йиғимлардан озод қилинади;
- унда меҳнат фаолиятини амалга ошираётган чет эллик ўқитувчи ва мутахассислар жисмоний шахслардан олинадиган даромад солиғи ва ижтимоий солиқ тўламайди.
Шунингдек, 2030 йил 1 январга нодавлат мактабгача ва умумий ўрта таълим ташкилотларининг Ўзбекистонда ишлаб чиқарилмайдиган қуйидаги товар жиҳозларига божхона тўловлари тўланмайди (божхона расмийлаштируви учун йиғимлар бундан мустасно):
- замонавий ўқув ва лаборатория ускуналари;
- компьютер техникаси ва дастурий маҳсулотлар;
- ўқув ва илмий-методик адабиётлар, анжомлар ва моддий-техник ресурслар.
2025 йил 1 январдан бошлаб нодавлат таълим ташкилотларига доимий жалб этиладиган педагог хорижий мутахассисларга “А-2” ўқитувчилар кириш визаларини бериш йўлга қўйилади.
Шунингдек, давлат ва нодавлат таълим ташкилотлари томонидан хориждан жалб қилинган мутахассисларга меҳнат қилиш ҳуқуқини берувчи тасдиқнома бериш йиғим миқдори БҲМнинг 30 бараваридан 1 бараваригача камайтирилади.
Ҳужжатда қайд этилишича, бундан ўзгаришлардан мақсад нодавлат таълим хизматларини кўрсатиш фаолиятини қўллаб-қувватлаш, таълим соҳасида хусусий сектор улушини янада ошириш, ушбу йўналишдаги тадбиркорлик субъектларига қулай шарт-шароитлар яратиш ҳамда ўқитишнинг инновацион педагогик шакллари, услублари ва технологияларини жорий қилишдир.
Бундан аввал Ўзбекистонда мактабгача ва мактаб таълими вазири жамғармаси ҳисобидан боғча ходимларини рағбатлантиришга рухсат этилиши ҳақида хабар берилган эди. 2025 йил 1 январдан мактабгача таълим ташкилотининг директори ўринбосари лавозими жорий этилади. Республиканинг барча туман (шаҳар)ларида камида биттадан таянч мактабгача таълим ташкилотлари фаолияти йўлга қўйилади.
Октябрда имзоланган президент фармони билан Ўзбекистонда хусусий боғчалар ташкил этиш учун ажратилган имтиёзли кредитларни қайтариш муддати 5 йилга узайтирилди.
Изоҳ (0)