Сурия собиқ раҳбари Башар Асаднинг президентлик саройида совғалар билан тўла хона топилди. Бу ҳақда New York Times (NYT) хабар берди.
Сурияда исёнчилар Асад ағдарилганидан сўнг унинг саройини назоратга олди. Улар журналистларга қуролли жангчилардан бири ҳамроҳлигида бинони ичкаридан кўриб чиқишга рухсат берди.
Бинода Башар Асад бошқа мамлакатлардан келган меҳмонлардан олган совғалар билан тўлдирилган катта хона топилган.
Бу ерда қимматбаҳо тошлар билан безатилган эгарли ярим метрли туя, катта яшил ғилофга солинган Саудия Арабистонининг олтин қалъаси, Буюк Британия қироличаси Елизавета II ва унинг турмуш ўртоғи шаҳзода Филиппнинг 2002 йилга оид фотосурати топилди, дейди журналистлар.
Дамашқ қулашидан кўп ўтмай саройнинг катта қисми талон-торож қилинган.
Кўплаб хоналарда телевизорлар йўқ. Улкан анжуманлар залининг поли қутиларга тўлиб кетганди. Бу қутиларда, чамаси, қимматбаҳо тақинчоқлар ва нафис шиша буюмлар — эҳтимол, юқори мартабали меҳмонларга мўлжалланган совғалар сақлангандир, дейилади мақолада.
Собиқ президент қароргоҳи остида ерости туннеллари тармоғи аниқланган. Al Jazeera телеканали эълон қилган видеода узун йўлак акс этган бўлиб, унда кўплаб бурилишлар мавжуд, охир-оқибат у каравотлар, диванлар ва столлар жойлашган хоналарга олиб киради.
Суриядаги сўнгги воқеалар
Ноябрь ойи охирида қуролли исёнчилар Сурия шимолий қисмига юришни бошлади. Улар Идлиб вилоятини, мамлакатдаги аҳоли сони бўйича иккинчи ўринда турувчи Ҳалаб шаҳрини, Хама ва Хомс вилоятлари ҳудудларининг бир қисмини ўз назоратига олди. Улар 8 декабрга ўтар кечаси Дамашққа кирди. Президент Асад тахтдан ағдарилганини эълон қилишди. Сурия президенти оиласи билан Россияда бошпана топди. Исёнчилар унинг боши учун 10 миллион доллар мукофот ваъда қилган.
Асад Сурияни тарк этганидан кейин исёнчилар унинг қароргоҳига бостириб кирган, одамлар буюмларни талон-торож қилган. Қароргоҳдаги гаражда BMW, Audi, Ferrari, Lamborghini Diablo каби 50 га яқин ҳашаматли ва қимматбаҳо автомобиллар аниқланган.
Изоҳ (0)