Дамашқ Сурия қўзғолончилари томонидан эгаллангандан сўнг ҳокимиятни йўқотган ва Россияга қочган Суриянинг собиқ президенти Башар Асад Россия пойтахтининг элиталар яшайдиган Москва сити ҳудудига жойлашган бўлиши мумкин.
Аниқланишича, бу ерда унинг қариндошлари кўчмас мулкка эгалик қилади.
Financial Times маълумотларига кўра, Асаднинг қариндошлари 2013 йилдан 2019 йилгача Москва cитида умумий қиймати камида 30 миллион доллар бўлган 20 дан ортиқ ҳашаматли квартираларни харид қилган. Ҳужжатларга кўра, 13 та объектга Асаднинг амакиваччаси Ҳофиз Маҳлуф ёки унинг назоратидаги компаниялар эгалик қилади. Яна иккита квартирани бошқа амакиваччаси Рами Маҳлуфнинг рафиқаси сотиб олган.
Тўртта квартира Асаднинг амакиваччалари — Иҳоб ва Иёд Махлуфлар номига расмийлаштирилган. Бундан ташқари, Асаднинг яна бир амакиваччаси Маҳлуб Москва бизнес марказидан бир неча дақиқалик масофада жойлашган уч хонали квартира сотиб олган. Россия пойтахтида қимматбаҳо кўчмас мулк харид қилиш учун собиқ Сурия президентининг қариндошлари офшор компаниялардан фойдаланишган.
Суриядаги вазият
Ноябрь ойи охирида қуролли исёнчилар Сурия шимолий қисмига юришни бошлади. Улар Идлиб вилоятини, мамлакатдаги аҳоли сони бўйича иккинчи ўринда турувчи Ҳалаб шаҳрини, Хама ва Хомс вилоятлари ҳудудларининг бир қисмини ўз назоратига олди. Шундан сўнг Дамашққа кирди. Президент Башар Асад оиласи билан мамлакатни тарк этди.
Россия Ташқи ишлар вазирлиги Башар Асад исёнчилар билан келишувга эришиб, истеъфога чиқишга рози бўлгани, шундан кейин Сурияни тарк этгани ҳақида маълумот берди. Исёнчилар Асадни қўлга олишда ёрдам берадиган маълумот учун 10 миллион доллар ваъда қилган.
Сиёсатчи мамлакатни тарк этганидан кейин исёнчилар Асад қароргоҳига бостириб кирган, одамлар буюмларни талон-торож қилган. Қароргоҳдаги гаражда BMW, Audi, Ferrari, Lamborghini Diablo каби 50 га яқин ҳашаматли ва қимматбаҳо автомобиллар аниқланган.
Кечроқ Кремлдаги манбалар Суриядан қочган президент оиласи билан Москвага келгани, Путин уларга бошпана берганини маълум қилди.
Изоҳ (0)