Исроил бош вазири Биньямин Нетаньяху шаклланаётган Сурия ҳукуматига йўллаган мактубида муносабатларни яхшилаш истагини билдирди. Бироқ у Исроилга хавф туғдирган тақдирда Сурияга ҳужум қилинишидан огоҳлантирди. Бу ҳақда The Times of Israel хабар берди.
Агар бу режим Эронга Сурияда ўз мавқейини тиклашига йўл қўйса ёки Эрон қуролини ёхуд бошқа қуролларни “Ҳизбуллоҳ”га етказишга рухсат берса ёки бизга ҳужум қилса, қатъий жавоб қайтарамиз ва оғир товон тўлашга мажбур қиламиз. Аввалги режим бошига тушган кўргиликлар бу режимни ҳам кутади, деди Нетаньяху.
У Исроил Суриянинг ички ишларига аралашишдан манфаатдор эмаслигини, аммо хавфсизлик манфаатларини ҳимоя қилиш учун барча зарур чораларни кўришини таъкидлади.
Суриядаги сўнгги воқеалар
Ноябрь ойи охирида қуролли исёнчилар Сурия шимолий қисмига юришни бошлади. Улар Идлиб вилоятини, мамлакатдаги аҳоли сони бўйича иккинчи ўринда турувчи Ҳалаб шаҳрини, Хама ва Хомс вилоятлари ҳудудларининг бир қисмини ўз назоратига олди. Улар 8 декабрга ўтар кечаси Дамашққа кирди. Президент Асад ағдарилганини эълон қилишди.
Сурия президенти оиласи билан Россияда бошпана топди. Исёнчилар унинг боши учун 10 миллион доллар мукофот ваъда қилган. Асад Сурияни тарк этганидан кейин исёнчилар унинг қароргоҳига бостириб кирган, одамлар буюмларни талон-торож қилган. Қароргоҳдаги гаражда BMW, Audi, Ferrari, Lamborghini Diablo каби 50 га яқин ҳашаматли ва қимматбаҳо автомобиллар аниқланган.
Изоҳ (0)