Сурия президенти Башар ал-Асад 19 май, жума куни очилган Араб давлатлари лигаси (АДЛ) саммитида иштирок этиш учун Саудия Арабистонига келди. Суриянинг аl-Watan газетаси ёзишича, Сурия раҳбари Жиддада араб давлатлари раҳбарлари билан икки томонлама учрашувлар ҳам ўтказади. Асаднинг АДЛ ишида иштирок этиши унинг ўн йилдан ортиқ изоляциядан сўнг жаҳон дипломатик майдонига қайтишини англатади, деб таъкидлайди ОАВ.
2011 йил ноябрда Сурияда ҳукуматга қарши намойишларнинг кескин бостирилиши ва мамлакатда қуролли можаронинг бошланиш фонида АДЛ Дамашқнинг лигадаги иштирокини тўхтатган эди. 2012 йилда Саудия Арабистони Суриянинг қуролли мухолифати тарафга ўтиб, Асад режими билан алоқаларини узди. Аксарият араб давлатлари ҳам худди шундай позицияга амал қилди.
Араб давлатлари Асад режимига нисбатан муносабатини ўзгартирмоқда
Бироқ Асад режимининг фуқаролар уруши даврида Россия ва Эрон кўмагида эришган муваффақиятлари сўнгги пайтларда минтақа давлатларининг Сурияга нисбатан позицияларини қайта кўриб чиқишга мажбур қилди. Бу ерда минтақавий рақобатчилар — Эрон ва Саудия Арабистонининг яқинлашуви муҳим рол ўйнади. Бу Хитой дипломатиясининг саъй-ҳаракатлари натижасида содир бўлди.
2023 йил 7 май куни АДЛ мамлакатлари ташқи ишлар вазирлари АҚШ норозилигига қарамай, Сурияни ташкилотга қайтаришга қарор қилди. Ҳозирда араб дунёсида Асад билан яқинлашишга ягона қарши давлат Қатар бўлиб турибди. Бироқ у Суриянинг АДЛга қайтишига эътироз билдирмади, бу Башар Асад ҳокимиятини қонунийлаштиришда муҳим қадам бўлди. Бундан ташқари, АДЛга қайта аъзо бўлиш Дамашққа қўшнилари билан савдо алоқаларини ривожлантириш, шунингдек, Форс кўрфазининг бой давлатларидан иқтисодий ёрдам ва сармоя олиш имкониятини берди.
Изоҳ (0)