Франция президенти Эммануэл Макрон агар Россия Украинада ғалаба қозонса, Европа хавфсиз бўлмаслигини айтди. Макрон TF1 ва France 2 телеканалларига берган интервьюсида украинларга ёрдам бериш, қўшин юбориш ва Россия президенти Владимир Путиннинг ядро таҳдидлари ҳақида гапирди.
Европа бирлиги ҳақида
Эммануэл Макрон уруш учун жавобгарлик фақат Россия зиммасида эканини таъкидлади.
“Бизнинг масъулиятимиз тинчлик йўлида кучли бўлиш, Европа бирлигини қўллаб-қувватлашдир. Бирлигимизни сақлаш — тийиб туриш, қаршилик кўрсатиш ва хавфсизлигимиз учун кучли бўлишни англатади”, — деди у.
Украинани қўллаб-қувватлаш ҳақида
Франция президенти Украинага ёрдам кўрсатишга қарши бўлган ёки бу масалада бетараф қолган мағлубият йўлини танлашини айтди.
“Агар Украина қуласа, хавфсизлигимиз хавф остида қолади. Ҳозирда биз Россия эскалацияни давом этса, вазият ёмонлашса, тайёр бўладиган вақтдамиз. Тайёргарлик учун эса Россия ҳеч қачон ғалабага эришмайдиган қарорларни қабул қилишга шай бўлимишимиз керак”, — дея қўшимча қилди президент.
Кремль режими ҳақида
Макрон кенг кўламли уруш бошида Путин билан бўлган телефон суҳбатларини эслади.
“Ватандошларимиз биз дуч келаётган вазият учун фақат битта шахс масъул эканини тушунишларини истайман: Кремль режими. Мен Владимир Путин билан ҳаммадан кўра кўпроқ гаплашган масъул раҳбарман. Бу суҳбатлар шахсий эмас ва уларни бу ерда шахсийлаштирмоқчи эмасман. Бундан ҳеч қандай маъно йўқ. Шунинг учун агар уруш тарқалиб кетса, Европада тарқалса, бу Россиянинг ягона танлови бўлади ва масъулияти унинг зиммасида.
Албатта, бугунги кунда Россия рақиб. Кремль режими эса душман. Мен доим айтганман, биз Россия ва рус халқи билан урушаётганимиз йўқ ва Украинани қўллаб-қувватлаймиз. Украина Россияни назорат остига олиши учун ҳамма нарса қиляпмиз, чунки суверенитет бўлмаса, Украина халқаро миқёсда тан олинган чегаралари, жумладан, Қримни қайтариб олмаса, барқарор тинчлик бўлмайди”, — дея қўшимча қилди у.
Франциянинг урушга тайёрлиги
Президент Францияда юқори интенсив ҳудудий урушларга мослаштирилган мудофаа саноати йўқлигини тан олди.
“Бугун Украинада тинчлик бўлиши учун биз кучсиз бўлмаслигимиз керак, шунинг учун вазиятга ҳушёрлик билан қарашимиз ва қатъият, ирода, жасорат билан айтишимиз керакки, мақсадимизга эришиш учун, жумладан, Россиянинг ғалаба қозонишига йўл қўймаслик учун ресурсларни сарфлашга тайёрмиз. Масъулият бизнинг бўйнимизда”, — деди Макрон.
Ядро қуроллари ҳақида
Ядро қуроллари Франциянинг зиммасига ҳеч қачон эскалацияда иштирок этмаслик мажбуриятини юклайди, деди президент.
“Биз тайёрмиз, бизда мустаҳкам доктрина бор, ядровий масалаларга келганда эса кўп сўз керак эмас. Ядровий имкониятларимиз биринчи навбатда хавфсизликни таъминлайди”, — дея қўшимча қилди у.
Бугунги кунда дунёда тахминан 13 080 та ядро каллаклари мавжуд. Қуйидаги давлатлар ядро қуролига эга:
- Россия — 6257 та (1458 фаол, 3039 яроқли, 1760 эскирган);
- АҚШ — 5,550 та (1,389 фаол, 2,361 яроқли, 1,800 эскирган);
- Хитой — 350 та мавжуд (ядро арсеналини фаол равишда кенгайтирмоқда);
- Франция — 290 та;
- Буюк Британия — 225 та;
- Покистон — 165 та;
- Ҳиндистон — 156 та;
- Исроил — 90 та;
- Шимолий Корея — 40-50 та (тахминий).
Франция хавфсизлиги
Макроннинг айтишича, мамлакат ўз мақсадига эришиш учун қўлидан келган ҳамма нарсани қилади.
“Чунки Россия ғалаба қозонса, французлар ҳаёти қандай ўзгаради? Европада бошқа хавфсизлик бўлмайди. Ким ўз мажбуриятларини ҳам, чекловларни ҳам ҳурмат қилмаган Путин эришганлари билан тўхтаб қолади деб ўйлади? Французларнинг хавфсизлиги хавф остида. Бу бизнинг ҳаётий манфаатларимиздир”, — таъкидлади Макрон.
26 февраль куни Макрон Европа давлатлари раҳбарлари билан учрашувдан сўнг Украинага қўшин киритилиши эҳтимолини рад этмади. У бу Киевни қўллаб-қувватлаш вариантларидан бири эканини таъкидлаган. Макроннинг ташаббуси Буюк Британия, Венгрия, Италия, Словакия, Чехия ва Швеция томонидан қўллаб-қувватланмаган.
Кремль бу ҳолатда “биз Россия ва НАТО ўртасидаги тўғридан тўғри тўқнашув эҳтимоли ҳақида эмас, балки муқаррарлиги ҳақида гапиришимиз керак” дея муносабат билдирди. НАТО бош котиби Йенс Столтенберг альянс Украинага ўз қўшинларини юборишни режалаштирмаётганини айтди.
Изоҳ (0)