Тошкентда 658 млн сўмлик пиротехника буюмларини уйда сақлаётган шахс ушланди
Тошкент шаҳрининг Чилонзор туманидаги хонадондан 658,6 млн сўмлик пиротехника буюмлари ашёвий далил сифатида олинди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.
Фото: Бош прокуратура ҳузуридаги Иқтисодий жиноятларга қарши курашиш департаменти
Маълум қилинишича, Чилонзор тумани, “Бешқўрғон” МФЙ ҳудудида яшовчи М.К.нинг (муқаддам судланган) хонадонидан янги йил байрами арафасида сотиш мақсадида олиб келинган умумий баҳоси 658,6 млн сўмлик хорижда ишлаб чиқарилган 4 440 дона Creative Cоlor Smoke номли ҳамда 20 127 дона номи ёзилмаган пиротехника буюмлари ашёвий далил сифатида олинган.
Фото: Бош прокуратура ҳузуридаги Иқтисодий жиноятларга қарши курашиш департаменти
Мазкур ҳолат юзасидан Жиноят кодексининг 250-1-моддаси (пиротехника буюмларининг қонунга хилоф муомаласи) билан жиноят иши қўзғатилиб, тергов ҳаракатлари ўтказилмоқда.
Фото: Бош прокуратура ҳузуридаги Иқтисодий жиноятларга қарши курашиш департаменти
Пиротехника воситаларининг муомалага киритилишига қарши кураш
9 ноябрь куни “Чинор” ЙПХ масканида пиротехника воситалари олиб кетаётган юк автомобили тўхтатиб қолингани хабар берилганди.
Автомобильнинг юкхонасида 36 та “Волк”, 35 та “Самарканд”, 48 тадан “Британик” ҳамда “Трения” ва 38 та “Соловей разбойник” номли пиротехника воситалари олиб кетилаётгани аниқланган.
Бундан ташқари, Тошкент вилоятида ўз уйида 536 дона пиротехника воситаларини сақлаб келган шахс ушланганди.
Ўзбекистон ҳудудига 2021–2023 йилларда 300 мингдан ортиқ пиротехника буюмлари ноқонуний олиб кирилгани ҳақида хабар берилганди.
Изоҳ (0)