Ижтимоий тармоқларда ППХ ходимлари мактаб ўқувчисини машинага мажбуран тиқиб олиб кетиши акс этган видео тарқалиб, кенг муҳокамаларга сабаб бўлди. Болалар омбудсмани ҳолат юзасидан маълумот берди.
Аниқланишича, 2023 йил 22 декабрь куни Чилонзор тумани Чилонзор-3 мавзесида ИИО ходимлари Ш.М. ва А.О. 2011 йилда туғилган К.П.да пиротехника воситалари борлигини аниқлаб, болани хизмат машинасига куч ишлатиб, мажбуран ўтқазишга уринган ҳолда унга нисбатан қўпол ва номақбул муносабатда бўлган.
Бунинг оқибатида эса бола бош соҳасидан лат еган ва қаттиқ эмоционал қўрқиш ҳолатига тушган.
Ички ишлар ходимларига нисбатан мазкур ҳолат юзасидан хизмат текшируви ўтказилиб, Ш.М. ва А.О. ҳаракатларида вояга етмаган болага нисбатан қўпол муносабатда бўлиш ҳамда ИИВ Касб маданияти кодексини бузиш юзасидан ҳайфсан интизомий жазоси қўлланилган.
1 февраль куни тасвирдаги боланинг онаси Болалар омбудсманига мурожаат қилган.
“Ҳуқуқни муҳофаза қилувчи орган ходимларининг бола манфаатларига зид бўлган бу каби ҳаракатларига мутлақо йўл қўйиб бўлмайди ва бунга жавобан қонун доирасидаги қатъий чора кўрилиши шарт”, — дейилади хабарда.
Қайд этилишича, ҳозирда Болалар омбудсмани сўровига кўра Тошкент шаҳар прокуратураси мазкур ҳолатга ҳуқуқий баҳо бериш масаласини ўрганмоқда.
Изоҳ (0)