Бош прокуратура ҳузуридаги департаментнинг Зангиота тумани бўлими томонидан ўтказилган тадбирда пиротехника буюмларини сотаётган шахслар ушланди. Бу ҳақида Бош прокуратура ҳузуридаги Иқтисодий жиноятларга қарши курашиш департаментининг расмий Telegram каналида маълум қилинди.
Жумладан, фуқаролар М.Б ва С.К. ўзаро тил бириктириб, пиротехника буюмларини ўтказиш орқали ноқонуний даромад орттириш мақсадида фуқаро М.А.га жами 2 400 қути “Мики маус”, 56 дона “7 Шоц” номли ҳамда 13 дона “Коралевский салют” номли пиротехника буюмларини 3 220 АҚШ долларига сотган вақтида ашёвий далиллар билан ушланганлар.
Шу каби, департаментнинг Учтепа тумани бўлими, ДХХ ва божхона бошқармаси ходимлари ҳамкорлигида “Файзабод” МФЙ ҳудудидан ўтувчи Тошкент халқа йўлида ўтказилган тезкор тадбирда фуқаролар Х.О., Ф.М. ва бошқалар ноқонуний даромад орттириш мақсадида жами 108 дона “7 Shots” номли пиротехника буюмларини ўтказиш мақсадида олиб келган вақтида ушланганлар.
“Мазкур ҳолатлар юзасидан Жиноят кодексининг 250-1-моддаси (пиротехника буюмларининг қонунга хилоф муомаласи) билан жиноят ишлари қўзғатилиб, тергов ҳаракатлари ўтказилмоқда”, дейилади прокуратура департаменти хабарида.
9 ноябрь куни “Чинор” ЙПХ масканида пиротехника воситалари олиб кетаётган юк автомобили тўхтатиб қолингани хабар берилганди.
Автомобильнинг юкхонасида 36 та “Волк”, 35 та “Самарканд”, 48 тадан “Британик” ҳамда “Трения” ва 38 та “Соловей разбойник” номли пиротехника воситалари олиб кетилаётгани аниқланган.
Аввалроқ Ўзбекистон ҳудудига 2021–2023 йилларда 300 мингдан ортиқ пиротехника буюмлари ноқонуний олиб кирилгани ҳақида хабар берилганди.
Изоҳ (0)