Senatning Mudofaa va xavfsizlik masalalari qo‘mitasida “O‘zbekiston Respublikasining Maʼmuriy javobgarlik to‘g‘risidagi kodeksiga pirotexnika buyumlarining qonunga xilof muomalasi uchun javobgarlikni kuchaytirishga qaratilgan o‘zgartirishlar kiritish haqida”gi qonun dastlabki tarzda ko‘rib chiqildi. Bu haqda Senat matbuot xizmati xabar berdi.
Taʼkidlanganidek, 2021–2023-yillarda 239 ta holatda mamlakatimiz hududiga qiymati qariyb 2 mlrd so‘mlik 300 mingdan ortiq pirotexnika buyumlarini noqonuniy olib kirish holatlari aniqlangan.
Bundan tashqari, ushbu davr mobaynida ichki ishlar organlari tomonidan o‘tkazilgan tezkor-profilaktik tadbirlar va reydlar davomida 42 milliondan ortiq pirotexnika buyumlari olib qo‘yilgan.
Senatning Mudofaa va xavfsizlik masalalari qo‘mitasi tomonidan ushbu salbiy holatlarning oldini olish bo‘yicha masʼul tuzilmalarga senator so‘rovi ham yuborilgan. Mazkur so‘rovlarning natijasi o‘laroq pirotexnika buyumlarining qonunga xilof muomalasining oldini olishga qaratilgan yanada taʼsirchan javobgarlik choralari belgilangan qonun loyihasi ishlab chiqilib, parlamentga kiritish choralari ko‘rilayotgani maʼlum qilingan.
Bundan tashqari, qo‘mita tomonidan Davlat xavfsizlik xizmati Chegara qo‘shinlaridan mamlakatimiz hududlariga qo‘shni davlatlardan chegarani buzgan holda pirotexnika vositalarini olib o‘tish holatlarining oldini olish bo‘yicha profilaktik tadbirlarni yanada kuchaytirish bo‘yicha ko‘rilayotgan choralar yuzasidan maʼlumotlar ham olingan.
Qo‘mitada muhokama qilingan qonunga kiritilayotgan yangi normalar bugungi kunda olib borilgan hamkorlikdagi umumiy saʼy-harakatlarning amaliy natijasidir.
Qonun bilan Maʼmuriy javobgarlik to‘g‘risidagi kodeksning 1851-moddasida belgilangan huquqbuzarlik belgilarining har birini alohida qismlarga ajratgan holda har bir qilmish uchun alohida sanksiyalar belgilanmoqda, yaʼni mazkur moddaning birinchi qismida pirotexnika buyumlaridan qonunga xilof ravishda foydalanganlik uchun, ikkinchi qismida ularni noqonuniy ishlab chiqarganlik, tayyorlaganlik, saqlaganlik, tashiganlik, jo‘natganlik, olib chiqqanlik uchun, uchinchi qismida esa pirotexnika buyumlarini o‘tkazganlik va O‘zbekiston hududiga olib kirganlik uchun javobgarlik belgilanib, javobgarlik choralari kuchaytirilmoqda.
Bundan tashqari, “Ichki ishlar organlari to‘g‘risida”gi Qonunda hamda Vazirlar Mahkamasining tegishli qarorlarida ichki ishlar organlari tomonidan pirotexnika buyumlarining qonunga xilof muomalasiga oid holatlarni aniqlash, ularni olib qo‘yish va aybdor shaxslarni javobgarlikka tortish vazifalari yuklanganligi bois Qonun bilan Maʼmuriy javobgarlik to‘g‘risidagi kodeksga qo‘shimchalar kiritilib, pirotexnika buyumlarining qonunga xilof muomalasiga oid huquqbuzarliklarni sodir etganlik uchun maʼmuriy bayonnomalarni rasmiylashtirish vakolati Milliy gvardiya bo‘linmalari bilan bir qatorda ichki ishlar organlariga ham berilmoqda.
Muhokamalar jarayonida Qonun yuzasidan senatorlar, ekspertlar va tegishli vazirlik va idoralar vakillarining fikr-mulohazalari tinglandi.
Majlis yakunida Qo‘mitaning tegishli qarori qabul qilindi.
Izoh (0)