Ижтимоий тармоқларда Олтинкўл тумани “Қорақалпоқ” маҳалласида жойлашган 38-умумтаълим мактаб директорининг мактаб ўқувчиларини калтаклаётгани акс этган видеолавҳа тарқалди. Ҳолат юзасидан Андижон вилоят мактабгача ва мактаб таълим бошқармаси расмий маълумот берди.
“Дарё” мухбири воқеа тафсилотларига аниқлик киритиш мақсадида мактаб директори Манзура Маҳкамова билан боғланди.
“Шу мактабда 1990 йилдан бери ишлайман. Аввал ўқитувчи, сўнгра мактаб директорининг маънавий масалалари бўйича ўринбосари бўлиб ишлаганман. 2013 йилдан буён эса мактаб директори вазифасида меҳнат қилиб келяпман.
Мактабимизда 495 нафар ўқувчи таҳсил олади. Уларга 43 нафар педагог таълим-тарбия бериб келмоқда. 5-синфдан 8-синфга қадар бўлган синфлар иккинчи, қолган синфлар эса биринчи сменада ўқишади”, дейди директор.
Мактаб директори воқеа ҳақида сўзлаб, ўқувчи бошқа ўқувчиларга нисбатан зуғум қилиб келишини ва ҳаттоки синфни тутатиб юборганини билдирган.
“Шу кунга қадар ўқувчиларни ҳаттоки уришмасдим. Агар ишонмасангиз, жамоа ва ота-оналардан сўрашингиз мумкин. Калтак еган ўқувчи 8-синфда ўқийди — дарсларга қатнашмайди, ота-онаси тарбия бермайди, десам ҳам бўлади. Бу бола барча ўқувчиларга зуғум қилиб, нафсониятига тегиб келади.
Энди ҳолат ҳақида гапирадиган бўлсам, воқеа 30 октябрь куни юз берган. Ўша куни ота-оналардан бири келиб, шу бола фарзандига зуғум қилаётганлигини, бир кун аввал қўлига пиротехника воситасини бериб, мажбурлаб оттирганини, бир ой аввал эса сувга бўктирганини айтиб шикоят қилди. Агар бирор жойига бир нарса бўлса, нима бўларди, деди.
Ота-онанинг важи ҳақиқатан исботланди. Шунда болалар олдимда эди: бошқаларнинг олдида одам ажратяпти, деган гап бўлмасин деб озгина жазоладим. Лекин унақа қаттиқ урганим йўқ. Агар синчиклаб видеони кўрсангиз, кўзидан бирорта ёш чиққанини кўрмайсиз”, дейди Манзура Маҳкамова.
Таъкидланишича, аслида видео бир соат олинган. Унда ота-оналар ва ўқитувчиларнинг фикрлари ҳам ёзилган. Бироқ фақат директорга оид қисмигина ижтимоий тармоқларда тарқатилган.
“Аслида видео бир соатли. Уни мактабимизнинг мусиқа фани ўқитувчиси ортимдан туриб, яшириб олган экан. Видеони қирқиб, фақат менга оид жойларини қолдиришган. Ваҳоланки, бу ерда бошқа ўқитувчилар, синф раҳбарлари ва ота-оналар гапиргани ҳам бор эди.
Мактабдаги барча ўқувчиларни ўз фарзандимдек кўраман. Ўша куни хона шунақанги тутаб кетдики, 4 соат дарс ўтилмади. Пиротехника шундай нарса эканки, битта ёниб ўчадиган эмас, тепага чиқиб, тутайдиган экан. Аввалига хонага кимдир ўт қўйиб юбордимикан деб, қўрқиб кетдим. Учта ўқитувчим ҳидидан заҳарланиб, уч кундан бери мазаси йўқ, нафаси қисяпти”, дейди мактаб директори.
Манзурахон Маҳкамова суҳбат сўнгида ишдан бўшаш тўғрисида ариза ёзиб берганини билдириб, уйида фарзандига тарбия бермаётган ота-оналарга ҳам жазо чоралари қўлланилиши лозимлигини қайд этган.
“Шунча йил ишлаб бунақа ҳолат юз бермаганди. Асли раҳбарликка ҳавасманд эмасман — ўзимга яраша обрў-эътиборим, ҳурматим бор. Шунча йил қандай ишлаганимни халқ билади. Лекин ҳақиқат эгилади, букилади, синмайди. Аммо шундай бўлса-да ўз хоҳишимга кўра, ишдан бўшаш тўғрисида бугун бошқармага ёзиб бердим.
Ота-оналардан ҳам фарзандларига тўғри тарбия беришларини сўраб қолардим”, дейди Манзура Маҳкамова.
Изоҳ (1)
Bolani Axloq tuzatish koloniyasiga junatish kerak. Direktorni ishiga tiklash kerak.