Тошкент вилоятида кўкатлар ичида пиротехника воситалари яширилгани фош бўлди. Бу ҳақда вилоят божхона бошқармаси матбуот хизмати хабар берди.
Маълум қилинишича, Тошкент вилояти божхона бошқармаси контрабандага қарши курашиш бўлими, ДХХ ва ИИВ тезкор ходимлари билан ҳамкорликда ҳамда йўл-патрул хизмати ходимлари ёрдамида кенг қамровли тезкор тадбир ўтказилган.
Тадбир давомида Тошкент вилояти “Чинор” йўл-патрул хизмати масканида, фуқаро бошқарувидаги Kia русумли юк автотранспорт воситаси тўхтатилиб, кўздан кечирилган.
Текширув давомида ходимларни чалғитиш мақсадида автотранспорт юкхонасининг олди қисмига хуфиёна тарзда кўкатлар остида 9 дона картон қутиларда пиротехника воситалари яширилгани аниқланган. Суриштирув ишлари давомида ушбу пиротехника воситалари хорижда ишлаб чиқарилган ва четдан ноқонуний олиб кирилгани маълум бўлган.
Дастлабки ҳисоб-китобларга кўра, аниқланган салкам 86 минг дона пиротехника воситаларининг умумий қиймати 200 миллион сўмдан ошмоқда. Ҳозирда ҳолат юзасидан суриштирув ишлари олиб борилмоқда.
Аввалроқ Наманган вилояти Уйчи туманида 31 миллион сўмлик пиротехника буюмларини сотаётган шахслар ушлангани тўғрисида хабар берилганди. Шунингдек, Ангренда Тошкентга кетаётган Mercedes-Benz ичидан 250 минг донага яқин пиротехника воситалари топилган эди.
Изоҳ (0)