Ангренда Тошкентга кетаётган Mercedes-Benz ичидан 250 минг донага яқин пиротехника воситалари топилди

Тошкент вилояти Ангрен шаҳрида тўхтатилган Mercedes-Benz Sprinter автомобилига пиротехника воситалари ортилгани маълум бўлди, деб хабар беради ИИВ ЙҲХХ ахборот хизмати.

Маълум қилинишича, 5 декабрь куни соат 06:40 ларда Ангрен шаҳридан ўтувчи халқаро аҳамиятдаги А-373 автомобиль йўлининг 185-километрида хизмат олиб бораётган ЙПХ ходимлари томонидан Водий—Тошкент йўналишида ҳаракатланиб келаётган Mercedes-Benz Sprinter русумли автомобиль тўхтатилиб, текширилган. Текширув давомида мазкур транспорт воситасида 49,5 минг дона “Трения”, 192,5 минг дона “Британик” номли пиротехника воситалари ҳамда 1800 дона Milano номли тамаки маҳсулотлари олиб кетилаётгани аниқланган.

Ҳолат ўрнатилган тартибда расмийлаштирилиб, 1975 йилда туғилган ҳайдовчи У.Ж. ва аниқланган маҳсулотлар Ангрен шаҳар ИИБга топширилган.

Аввалроқ Наманган вилояти Уйчи туманида 31 миллион сўмлик пиротехника буюмларини сотаётган шахслар ушлангани тўғрисида хабар берилганди.