Тошкент вилояти божхона бошқармаси Контрабандага қарши курашиш тезкор ходимлари, ДХХ Тошкент шаҳар бошқармаси ҳамда ИИБ Йўл-патрул хизмати ходимлари билан ҳамкорликда Оҳангарон тумани ҳудудида тезкор тадбир ўтказилди. Бу ҳақда вилоят божхона бошқармаси матбуот хизмати хабар берди.
Тадбир давомида, Оҳангарон туманида Фарғона—Оҳангарон йўналиши бўйлаб ҳаракатланиб келаётган фуқаро бошқарувида бўлган, Mercedes-Benz Sprinter русумли автотранспорт воситаси тўхтатилган. Автомобиль холислар иштирокида кўздан кечирилганида, унинг юкхонасида хуфиёна тарзда кийим-кечаклар остига яширилган фуқаро Каюмовага тегишли бўлган, дастлабки ҳисоб-китобларга кўра, қиймати 200 миллион сўм бўлган жами 174 108 дона пиротехника воситалари борлиги аниқланиб, ашёвий далил сифатида олинган.
Ҳозирда, ҳолат юзасидан суриштирув ишлари олиб борилмоқда.
Аввалроқ Наманган вилояти Уйчи туманида 31 миллион сўмлик пиротехника буюмларини сотаётган шахслар ушлангани тўғрисида хабар берилганди. Шунингдек, Ангренда Тошкентга кетаётган Mercedes-Benz ичидан 250 минг донага яқин пиротехника воситалари топилган эди.
Изоҳ (0)