Toshkentda 658 mln so‘mlik pirotexnika buyumlarini uyda saqlayotgan shaxs ushlandi
Toshkent shahrining Chilonzor tumanidagi xonadondan 658,6 mln so‘mlik pirotexnika buyumlari ashyoviy dalil sifatida olindi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.
Foto: Bosh prokuratura huzuridagi Iqtisodiy jinoyatlarga qarshi kurashish departamenti
Maʼlum qilinishicha, Chilonzor tumani, “Beshqo‘rg‘on” MFY hududida yashovchi M.K.ning (muqaddam sudlangan) xonadonidan yangi yil bayrami arafasida sotish maqsadida olib kelingan umumiy bahosi 658,6 mln so‘mlik xorijda ishlab chiqarilgan 4 440 dona Creative Color Smoke nomli hamda 20 127 dona nomi yozilmagan pirotexnika buyumlari ashyoviy dalil sifatida olingan.
Foto: Bosh prokuratura huzuridagi Iqtisodiy jinoyatlarga qarshi kurashish departamenti
Mazkur holat yuzasidan Jinoyat kodeksining 250-1-moddasi (pirotexnika buyumlarining qonunga xilof muomalasi) bilan jinoyat ishi qo‘zg‘atilib, tergov harakatlari o‘tkazilmoqda.
Foto: Bosh prokuratura huzuridagi Iqtisodiy jinoyatlarga qarshi kurashish departamenti
Pirotexnika vositalarining muomalaga kiritilishiga qarshi kurash
Avvalroq Toshkentda pirotexnika buyumlarini sotayotgan shaxslar ushlangandi.
9-noyabr kuni “Chinor” YPX maskanida pirotexnika vositalari olib ketayotgan yuk avtomobili to‘xtatib qolingani xabar berilgandi.
Avtomobilning yukxonasida 36 ta “Volk”, 35 ta “Samarkand”, 48 tadan “Britanik” hamda “Treniya” va 38 ta “Solovey razboynik” nomli pirotexnika vositalari olib ketilayotgani aniqlangan.
Bundan tashqari, Toshkent viloyatida o‘z uyida 536 dona pirotexnika vositalarini saqlab kelgan shaxs ushlangandi.
O‘zbekiston hududiga 2021–2023-yillarda 300 mingdan ortiq pirotexnika buyumlari noqonuniy olib kirilgani haqida xabar berilgandi.
Izoh (0)