Тошкент вилоятида қиймати 356,4 миллион сўм бўлган пойтахтга олиб ўтилаётган 800 минг дан ортиқ пиротехника ушлаб қолинди. Бу ҳақда вилоят ИИББ ахборот хизмати хабар берди.
Қайд этилишича, тезкор-профилактик тадбирларнинг долзарб 40 кунлиги доирасида вилоят ИИББ ва ҳуқуқни муҳофаза қилувчи органлар билан ҳамкорлигида пиротехника воситаларини муомалага киритилишининг олдини олиш бўйича назорат-рейд тадбирлари кучайтирилган.
Мисол учун, куни кеча Оҳангарон туманида Водий-Тошкент йўналиши бўйлаб ҳаракатланиб келаётган Isuzu юк машинаси ҳудудий ИИБ, ДХХ ва божхона ходимлари томонидан ўрнатилган тартибда текширилди. Натижада дарахт кўчатлари остига беркитилган картон қутиларга жойлаштирилган қиймати 144 млн сўм бўлган пиротехника воситалари борлиги аниқланган ва далилий ашё сифатида ҳужжатлаштирилиб олинди.
Умуман, мазкур йўналишда ўтказилган тезкор-профилактик тадбирлар давомида турли ҳажм ва кўринишдаги умумий қиймати 356,4 млн сўм бўлган 805 минг дона пиротехника воситалари аниқланган ва қонуний тартибда муомаладан олинган.
Ҳудудда криминоген вазият барқарорлигини таъминлаш мақсадига қаратилган мазкур йўналишдаги назорат тадбирлари давом этмоқда.
Изоҳ (0)