Сенатнинг Мудофаа ва хавфсизлик масалалари қўмитасида “Ўзбекистон Республикасининг Маъмурий жавобгарлик тўғрисидаги кодексига пиротехника буюмларининг қонунга хилоф муомаласи учун жавобгарликни кучайтиришга қаратилган ўзгартиришлар киритиш ҳақида”ги қонун дастлабки тарзда кўриб чиқилди. Бу ҳақда Сенат матбуот хизмати хабар берди.
Таъкидланганидек, 2021–2023 йилларда 239 та ҳолатда мамлакатимиз ҳудудига қиймати қарийб 2 млрд сўмлик 300 мингдан ортиқ пиротехника буюмларини ноқонуний олиб кириш ҳолатлари аниқланган.
Бундан ташқари, ушбу давр мобайнида ички ишлар органлари томонидан ўтказилган тезкор-профилактик тадбирлар ва рейдлар давомида 42 миллиондан ортиқ пиротехника буюмлари олиб қўйилган.
Сенатнинг Мудофаа ва хавфсизлик масалалари қўмитаси томонидан ушбу салбий ҳолатларнинг олдини олиш бўйича масъул тузилмаларга сенатор сўрови ҳам юборилган. Мазкур сўровларнинг натижаси ўлароқ пиротехника буюмларининг қонунга хилоф муомаласининг олдини олишга қаратилган янада таъсирчан жавобгарлик чоралари белгиланган қонун лойиҳаси ишлаб чиқилиб, парламентга киритиш чоралари кўрилаётгани маълум қилинган.
Бундан ташқари, қўмита томонидан Давлат хавфсизлик хизмати Чегара қўшинларидан мамлакатимиз ҳудудларига қўшни давлатлардан чегарани бузган ҳолда пиротехника воситаларини олиб ўтиш ҳолатларининг олдини олиш бўйича профилактик тадбирларни янада кучайтириш бўйича кўрилаётган чоралар юзасидан маълумотлар ҳам олинган.
Қўмитада муҳокама қилинган қонунга киритилаётган янги нормалар бугунги кунда олиб борилган ҳамкорликдаги умумий саъй-ҳаракатларнинг амалий натижасидир.
Қонун билан Маъмурий жавобгарлик тўғрисидаги кодекснинг 1851-моддасида белгиланган ҳуқуқбузарлик белгиларининг ҳар бирини алоҳида қисмларга ажратган ҳолда ҳар бир қилмиш учун алоҳида санкциялар белгиланмоқда, яъни мазкур модданинг биринчи қисмида пиротехника буюмларидан қонунга хилоф равишда фойдаланганлик учун, иккинчи қисмида уларни ноқонуний ишлаб чиқарганлик, тайёрлаганлик, сақлаганлик, ташиганлик, жўнатганлик, олиб чиққанлик учун, учинчи қисмида эса пиротехника буюмларини ўтказганлик ва Ўзбекистон ҳудудига олиб кирганлик учун жавобгарлик белгиланиб, жавобгарлик чоралари кучайтирилмоқда.
Бундан ташқари, “Ички ишлар органлари тўғрисида”ги Қонунда ҳамда Вазирлар Маҳкамасининг тегишли қарорларида ички ишлар органлари томонидан пиротехника буюмларининг қонунга хилоф муомаласига оид ҳолатларни аниқлаш, уларни олиб қўйиш ва айбдор шахсларни жавобгарликка тортиш вазифалари юкланганлиги боис Қонун билан Маъмурий жавобгарлик тўғрисидаги кодексга қўшимчалар киритилиб, пиротехника буюмларининг қонунга хилоф муомаласига оид ҳуқуқбузарликларни содир этганлик учун маъмурий баённомаларни расмийлаштириш ваколати Миллий гвардия бўлинмалари билан бир қаторда ички ишлар органларига ҳам берилмоқда.
Муҳокамалар жараёнида Қонун юзасидан сенаторлар, экспертлар ва тегишли вазирлик ва идоралар вакилларининг фикр-мулоҳазалари тингланди.
Мажлис якунида Қўмитанинг тегишли қарори қабул қилинди.
Изоҳ (0)