Тошкент вилояти ИИББ тезкор ходимлари томонидан ДХХ Оҳангарон шаҳар ходимлари билан ҳамкорликда ўтказилган тезкор тадбирда 20 ёшли қиз одам савдоси қурбони бўлишининг олди олинди. Бу ҳақда вилоят ИИББ матбуот хизмати хабар берди.
Ўтказилган тезкор тадбирда Оҳангарон шаҳрида яшовчи 2002 йилда туғилган аёл (Ҳ.Т.) осон пул топиш мақсадида ўзига таниш бўлган 2004 йилда туғилган аёл (З.О.)ни алдаб, мўмай даромад топишга ишонтириб Тошкент халқаро аэропорти орқали Туркия давлатининг Истанбул шаҳрига фоҳишалик учун жўнатаётган вақтида далилий ашёлар билан ушланди.
Маълум бўлишича, аёлни Истанбулда Туркия фуқаролари кутиб олиши зарур бўлган.
Ҳозирда ушланган шахсга нисбатан Жиноят кодекси 135-моддаси (Одам савдоси) билан жиноят иши қўзғатилган. Тергов ҳаракатлари олиб борилмоқда.
Бундай ҳолатлар сони ортиб бормоқда
Март ойида Тошкентда 22 ёшли аёл икки тенгдошини Россияга сотиб юбораётганда қўлга олинганди. Июнь ойида Тошкент вилоятида қизларни фоҳишалик учун Туркияга жўнатаётган аёл ушланди.
Августда эса Тошкент аэропортида 20 ёшли қизни алдаб, Дубайга фоҳишаликка юбораётган эркак ушланганди.
Изоҳ (0)