Хитой, Бразилия ва яна ўнта давлат Украинага қарши ядро қуролидан фойдаланиш ёки қўллаш билан таҳдид қилишдан огоҳлантирди.
“Биз оммавий қирғин қуролларини, хусусан, ядровий, кимёвий ва биологик қуролларни қўллаш таҳдидларидан воз кечишга чақирамиз”, дейилади 12 давлатнинг БМТ Бош Ассамблеяси доирасида Украина бўйича вазирлар йиғилишидан сўнг эълон қилинган қўшма баёнотида.
Ушбу ҳужжатга Хитой ва Бразилиядан ташқари Боливия, Туркия, Жанубий Африка, Колумбия, Миср, Индонезия, Қозоғистон, Кения, Замбия ва Жазоир ҳам ўз имзоларини қўйган. Ушбу давлатлар Украинадаги можаро авж олиш хавфидан чуқур хавотир билдирган.
“Фуқаролик инфратузилмаси, жумладан, атом электр станциялари ва бошқа энергетика объектлари ҳарбий амалиётлар нишонига айланмаслиги керак”, дейилади баёнотда.
Жорий ҳафтада Россия президенти Владимир Путин мамлакат ҳудудига оммавий ҳаво зарбалари берилган тақдирда Россия ядро қуролидан фойдаланиши мумкинлигини маълум қилганди. Шунингдек, у ядровий давлат кўмагида Россияга қилинган ҳар қандай ҳужум мамлакатга қўшма тажовуз сифатида баҳоланишини таъкидлаган.
25 сентябрь куни Украина президенти Владимир Зеленский Москвани Украина атом электр станцияларига ҳужумга тайёргарлик кўраётганликда айблаган эди. У, шунингдек, Киев учун номақбул шартлар асосида Украинадаги урушни ҳал қилишда ўзларини воситачи сифатида таклиф қилаётган Хитой ва Бразилияни ҳам танқид қилган.
27 сентябрда қабул қилинган қўшма декларацияда 12 давлат барча халқаро низоларни тинч йўл билан ҳал этиш муҳимлигини таъкидлаган.
“Биз БМТ низоми асосида кенг дипломатия ва сиёсий воситалар орқали кенг қамровли ва узоқ муддатли келишувга эришиш учун можаро томонларини қўллаб-қувватлашга чақирамиз”, дейди давлат вакиллари.
Изоҳ (0)