Фаластиннинг ҲАМАС ҳаракати делегацияси Ғазо секторида ўт очишни тўхтатиш бўйича музокаралар олиб бориш учун Қоҳирага боради. Бу ҳақда The Times of Israel нашри хабар берди.
АҚШ республикачи сенатори Линдси Грем ўтган ҳафта Исроилга ташриф буюриб, расмийлар, жумладан, Бош вазир Биньямин Нетаньяху билан учрашди. Музокаралар чоғида у АҚШнинг сайланган етакчиси Дональд Трамп январь ойида инаугурациясидан олдин Ғазо секторида ўт очишни тўхтатиш бўйича келишувга кўмаклашишни хоҳлаётганини айтди.
“Трампнинг бу баёноти 30 ноябрь шанба куни ҲАМАС делегациясининг ўт очишни тўхтатиш бўйича музокаралар ўтказиш учун Қоҳирага келишидан олдин янгради”, дейилади мақолада.
Исроил ва Ливаннинг “Ҳизбуллоҳ” ҳаракати 27 ноябрдан кучга кирган ўт очишни тўхтатиш бўйича келишувга эришди. Мазкур келишувда воситачилик қилган АҚШ президенти Жо Байденнинг айтишича, келишув “ҳарбий ҳаракатларни доимий тўхтатиш” ва тинч аҳолининг Ливан-Исроил чегарасидаги жабрланган ҳудудларга қайтиши учун шароит яратишни ўз ичига олади.
Аввалроқ Қатар ҲАМАС ва Исроил ўртасида тинчликка эришишдаги воситачилик саъй-ҳаракатларини тиклаши хабар берилганди.
“Ҳукуматим номидан шуни таъкидлайманки, биз ҳар икки томоннинг тинчликка эришиш истагини кўрганимиздан сўнг, Қатар бу можарони тинчлик билан ҳал қилиш йўлидаги барча саъй-ҳаракатларни тўлиқ янгилашини кўрасиз”, деди Қатар ТИВ расмий вакили Мажид бин Муҳаммад ал Ансорий Римда бўлиб ўтган Ўрта Ер денгизи конференциясида.
Қатар ТИВ вакилининг қайд этишича, Қатар ҳар иккала томоннинг тайёрлигини кўрса, дарҳол музокаралар столига қайтишга тайёр.
Изоҳ (0)