АҚШ президенти Жо Байден Исроил бош вазири Биньямин Нетаньяху билан телефон суҳбатида Ғазода ўт очишни тўхтатиш ва гаровга олинганларни озод қилиш бўйича Қоҳирада бўлиб ўтадиган музокараларни муҳокама қилди.
Шунингдек, Оқ уй раҳбари Исроилни Вашингтоннинг доимий қўллаб-қувватлашига ишонтирган.
Байден ва Нетаньяху АҚШнинг Эрон таҳдидлари, жумладан, Теҳрон томонидан қўллаб-қувватланадиган ҳусийлар, шунингдек, ҲАМАС ва “Ҳизбуллоҳ” таҳдидига қарши Исроил мудофаасини кучайтириш борасидаги саъй-ҳаракатларни муҳокама қилган. Қайд этилишича, суҳбатда АҚШ вице-президенти, Демократик партиядан президентликка номзод Камала Ҳаррис ҳам иштирок этган.
Аввалроқ Қатарда Исроил ва ҲАМАС ўртасида алмашинув битими бўйича музокаралар раунди якунлангани ҳақида хабар берилган эди.
Музокараларда воситачи бўлган Қатар, АҚШ ва Миср томонидан эълон қилинган қўшма якуний баёнотга кўра, Америка томони ўтган ҳафталар давомида эришилган келишувларга асосланиб, томонлар келишувни тезда амалга ошириши учун янги таклиф киритган.
Баёнотда айтилишича, музокаралар жиддий ва ижобий муҳитда ўтган. Воситачиларнинг сўзларига кўра, “яқин кунларда ўт очишни тўхтатиш келишуви тафсилотлари, жумладан, Ғазодаги исроиллик гаровга олинганлар ва Исроилдаги фаластинлик маҳбуслар билан боғлиқ масалалар бўйича профессионал ишлар давом этади”.
Исроил бош вазири Биньямин Нетаньяхунинг идораси Қатардаги саммит натижаларига жавобан қуйидаги хабарни эълон қилган:
“Исроил АҚШ ва воситачиларнинг ҲАМАС билан асирларни озод қилиш бўйича келишувга эришиш борасидаги саъй-ҳаракатларини қадрлайди. Исроил воситачиларнинг босими ҲАМАСни 27 май тамойилларини қабул қилишга кўндиришига ишонади, шунда келишув амалга оширилади.”
ҲАМАСдаги манба Қатарнинг Al Jazeera’га берган интервьюсида “воситачиларнинг саммит якунлари ҳақидаги ҳисоботига кўра, музокаралар натижалари 2 июлда келишилган шартларга мос келмаган”.
Изоҳ (0)