Ҳиндистон 2036 йилги ёзги Олимпия ўйинларига мезбонлик қилиш ҳуқуқини қўлга киритса, дунёнинг етти мўжизасидан бири ҳисобланган Тож Маҳал Олимпия ўйинларининг рамзларидан бирига айланиши мумкин. Бу ҳақда “Times of India” нашри хабар тарқатди.
Унда айтилишича, Тож Маҳал мажмуаси жойлашган Агра шаҳри Олимпия ўйинларининг мусобақа ва тадбирлари ўтказиладиган мамлакатдаги 3 та йирик шаҳарлардан бири бўлиши белгиланмоқда.
Ҳиндистон 2036 йилги Олимпиада ўйинларига мезбонлик қилиш аризасини Халқаро Олимпия қўмитасининг (ХОҚ) Келажакдаги мезбонлар комиссиясига жорий йил октябрь ойида тақдим этганди. Дастлаб 132 минг ўринли Нарендра Моди стадионига эга Аҳмадобод ва мамлакатнинг молиявий маркази Мумбай Олимпиада тадбирлари ўтадиган асосий шаҳарлар сифатида кўрсатилганди. Энди улар сафига Ҳиндистон рамзи саналадиган Тож Маҳал ёдгорлигига эга Агра ҳам қўшилиши мумкин.
2036 йилги Олимпия ўйинларини қабул қилиш борасида Ҳиндистон ҳаракати Токио Олимпиадасидан аввал бошланган бўлиб, расман 2023 йили Мумбай шаҳрида ўтган Халқаро олимпия қўмитасининг 141-сессиясида эълон қилинди. Ўтган йиллар давомида Ҳиндистон Олимпия ассоциацияси бу борада ХОҚ билан бир неча бор стратегик муҳокамалар ўтказди.
Маълумот учун, ушбу мусобақани ўтказиш учун Ҳиндистондан ташқари, Канада, Қатар, Саудия Арабистони, Миср ва бошқа давлатлар қизиқиш билдирган. 2036 йилги мезбон Осиё давлатларидан танлаб олиниши кутилмоқда.
Изоҳ (0)